Tezroq ozish uchun suli yormasini qachon va qanday iste’mol qilish lozim? Mutaxassis maslahati

Izlab topish oson, arzon va shu bilan birga haqiqatan ham sog‘lom bo‘lishga yordam beradigan suli yormasining foydali jihatlari serob. Diyetolog va parhez tutuvchi insonlar orasida ushbu mahsulot ancha mashhur. “Sports.kz” nashri xabar berishicha, mutaxassislar suli yormasidan tayyorlangan bo‘tqaning yana bir afzalligini aniqladi.

Suli yormasidan tayyorlangan bo‘tqa ko‘p mamlakatlarda keng tarqalgan nonushta turi bo‘lib, uni suv yoki sutda pishirish, shakar, asal, yong‘oq, mevalar qo‘shib iste’mol qilish mumkin. Amerikalik diyetologlar aniqlashicha, mazkur bo‘tqaning ilgari aytilmagan yana bir foydali jihati aniqlandi. Ma’lum bo‘lishicha, suli yormasi jismoniy mashg‘ulotlar samarasini oshirishi mumkin. Agar sport mashg‘ulotlarini bajarishdan avval proteinli qo‘shimchalar yeyishga odatlangan bo‘lsangiz, ularning o‘rnini suli yormasi bosishi mumkin. Bundan tashqari, u moddalar almashinuvini yaxshilaydi.

Suli yormasi metabolizm jarayonini tezlashtiradi. Sport mashg‘ulotlaridan keyin bir soat ichida iste’mol qilsangiz, mashg‘ulotingiz organizmga samaraliroq bo‘ladi, — deydi diyetolog Jey Kovin.

Albatta, buning uchun bo‘tqani suvda pishirish va shakar, tuz, sariyog‘ kabi qo‘shimchalar solmaslik lozim.

Shuningdek, suli yormasi yurak-qon tomirlari hamda oshqozon-ichak traktining faoliyatini yaxshilashga yordam beradi.

Suli tarkibidagi kletchatkalar ichaklar faoliyatini yaxshilaydi va undagi foydali bakteriyalarni oziqlantirish uchun zarur bo‘lgan prebiotiklarni o‘zida saqlaydi. Shuning uchun suli immunitetni mustahkamlashga, surunkali kasalliklar xavfini kamaytirishga va organizmdagi yallig‘lanishni kamaytirishga yordam beradi, — deydi Trista Best.

Suli yormasi tarkibida mavjud bo‘lgan beta-glyukanlar nafaqat xolesterin, balki qonda shakar miqdoriga ham ta’sir qiladi, bu ichaklarda ovqat hazm qilishni sekinlashtiradi. Shunday qilib, ovqatlanish paytida glyukoza darajasi sezilarli oshadi. Yorma esa uni kamaytirishga yordam beradi. Bu juda muhim xususiyatdir, chunki glyukozaning oshishi organizmni zo‘riqtiradi, samaradorlikni pasaytiradi. Normal glyukoza darajasi esa uzoq vaqt davomida to‘qlik hissini beradi.