Самарқанд вилоятида иккита иссиқхона табиий газдан ноқонуний фойдаланиши натижасида тизимга 1 миллиард сўмдан зиёд зарар етказилгани аниқланди. Бу ҳақда “Ўзэнергоинспекция” матбуот хизмати хабар берди.
Қайд этилишича, Бош прокуратура ҳузуридаги департамент, ИИБ, “Ўзэнергоинспекция” ва газ таъминоти корхонаси ходимлари билан ҳамкорликда Самарқанд вилоятида ўтказилган назорат тадбирларида табиий газдан ноқонуний фойдаланиш ҳолатлари аниқланмоқда.
Хусусан, Пастдарғом тумани, “Найман” МФЙда истиқомат қилувчи фуқаро Ғ.Х. ўзига қарашли иссиқхонага ҳеч қандай ҳужжатсиз тижорат мақсадида 20 дона қўлбола усулда ясалган иситиш ускунасини ўзбошимчалик билан ўрнатиб, жами 688,9 миллион сўмлик табиий газдан ноқонуний фойдалангани аниқланган.
Шунингдек, “Қозоқ-Найман” маҳалласида истиқомат қилувчи фуқаро Х.Ш. ўзига тегишли иссиқхонада қўлбола усулда ясалган иситиш ускуналарини ўрнатиб, 329,6 миллион сўмлик табиий газдан ноқонуний фойдалангани маълум бўлган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Апрель бошларида Сурхондарё вилоятининг Денов, Қашқадарё вилоятининг Муборак ҳамда Фарғона вилоятининг Марғилон шаҳрида газдан ноқонуний фойдаланиш ҳолатлари фош этилган, Андижонда 1,3 млрд сўмлик электр энергиясидан ноқонуний фойдаланган ишлаб чиқариш цехи аниқлангани тўғрисида хабар берилган эди.
Изоҳ (0)