Навоий, Тошкент ҳамда Андижон вилоятларида кредит маблағларини талон-торож қилиш ҳолатлари аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, ўтказилган терговга қадар текширувда “Б.” МЧЖ масъул шахслари Давлат кадастрлари палатаси Кармана туман бўлимидан тумандаги “Ёшлик” истироҳат боғини рўйхатдан ўтказилганлиги тўғрисидаги сохта кадастр ҳужжатлари расмийлаштиришга эришиб, тижорат банки филиалидан истироҳат боғини ободонлаштириш ҳамда техникалар ва аттракционлар харид қилиш учун ажратилган 6,5 млрд сўм кредит маблағларини ўзлаштириш йўли билан талон-торож қилганликлари аниқланган.
Департаментнинг Тошкент туман бўлими томонидан ўтказилган терговга қадар текширувда “Ж.А.” оилавий корхонаси раҳбари С.С. ва бошқалар наслли чорва моллари сотиб олиш ва қўшимча молхона биносини қуриш мақсадида ҳудудий тижорат банки филиалидан ажратилган кредит эвазига харид қилинган 160 бош наслли чорва молларни бошқа шахсларга нақд пулга сотиб, расмий ҳужжатларга сохта маълумотлар киритиш орқали жами 2 млрд сўм кредит маблағини талон-торож қилганликлари аниқланган.
Шу каби департаментнинг Андижон туман бўлими томонидан ўтказилган терговга қадар текширувда “Д.А.” фермер хўжалиги раҳбари Д.А. ва бошқалар тижорат бакни филиалидан ажратилган кредит маблағлари эвазига қўшни Қирғизистон Республикасидан олиб келинган насли чорва молларини нақд пулга сотиб юбориб, 1,6 млрд сўм имтиёзли кредит маблағларини ўзлаштириш йўли билан талон-торож қилганликлари аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)