“Xorazm lazgi raqsi” sanʼatining asriy anʼanalarini saqlash va rivojlantirish, raqs sanʼati orqali xalqlar o‘rtasidagi do‘stlik, birodarlik rishtalarini mustahkamlash maqsadida 25—30-aprel kunlari Xorazm viloyatining Xiva shahrida II “Lazgi” xalqaro raqs festivali bo‘lib o‘tmoqda. Bu haqda “Daryo” muxbiri xabar berdi.
2024-yilda ikkinchi marotaba o‘tkazilgan II “Lazgi” xalqaro raqs festivalida dunyoning 33 davlatidan 200 dan ziyod isteʼdodli raqqosalar, professional raqs jamoalari, raqs sanʼati ustalari, musiqashunos va sanʼatshunos olimlar, taniqli sanʼatkorlar, yetuk mutaxassislar, faxriy mehmonlar ishtirok etmoqda.
O‘zbekiston nomidan ishtirok etish uchun O‘zbekiston bo‘ylab 2024-yilning I choragi davomida Madaniyat vazirligi tomonidan “Lazgi” xalqaro raqs festivali ko‘rik-tanlovi o‘tkazilib, unda respublika bosqichi g‘oliblari (3 ta (50 nafar atrofida) ashula va raqs ansambli va 3 nafar yakkaxon ijrochilar) Xalqaro festivalda O‘zbekiston nomidan ishtirok etdi.
Festivalda tanlov ishtirokchilari chiqishlarini baholab borish bo‘yicha xalqaro hakamlar hayʼati tarkibi shakllantirilgan bo‘lib, unda 5 ta (Fransiya, Misr, Braziliya, Koreya, Qozog‘iston) xorijiy davlatdan hamda O‘zbekiston (2 nafar) dan hakamlik qilmoqda.
Shuningdek, Xalqaro turkiy madaniyat tashkiloti – TURKSOY, Tojikiston Respublikasi, Qozog‘iston Respublikasi, Yaponiya, Braziliya, Fransiya, Misr Arab Respublikasi vakillari festivalda Faxriy mehmon sifatida ishtirok etyapti.
27-aprel kuni xorijiy va mahalliy raqs sanʼati ustalari, musiqashunos va sanʼatshunos olimlar, taniqli sanʼatkorlar va faxriy mehmonlar ishtirokida “Xorazm “Lazgi” raqsi: Madaniy diplomatiyani rivojlantirishning ilmiy – nazariy, maʼnaviy – maʼrifiy tamoyillari” mavzusida xalqaro ilmiy-amaliy konferensiyasi hamda shu kuni “Ichan qalʼa” majmuasida festivalning tantanali ochilish marosimi bo‘lib o‘tdi.
II “Lazgi” xalqaro raqs festivali doirasida xorijlik mutaxassislar ishtirokida davra suhbatlari, ijodiy uchrashuv va mahorat darslari, konsert tomoshalari va “Xorazm lazgi raqsi” sanʼatiga oid ko‘rgazmalar tashkil etilmoqda.
Izoh (0)