“Халқни алдагани, ўз ишига масъулиятсизлик билан ёндашгани учун қўполлик қилган”. Сурхондарёдаги мансабдорнинг сўкинишига изоҳ берилди

Telegram мессенжеридаги каналларда Сурхондарё вилоятида фаолият юритиши айтилган мансабдорнинг жуда қўпол сўзларни ишлатиб, кимларнидир ҳақорат қилгани акс этган видео тарқалди. 

Сурхондарё вилояти автомобиль йўллари Бош бошқармаси ахборот хизматининг ёзишича, бундай қўпол сўзлар муаллифи бошқарма бошлиғининг шахсан ўзи. 

Шўрчи тумани аҳолисидан 4Р105 автомобиль йўлининг 89–94-километрлари оралиғининг абгор ҳолатда экани ва таъмирлаш лозимлиги тўғрисида шикоят тушган. Шикоятда келтирилган йўлдаги камчилик ва носозликларни бартараф этиш мақсадида Сурхондарё вилояти автомобиль йўллари бош бошқармаси бошлиғи Шўрчи туман йўллардан фойдаланиш корхонаси давлат муассасаси раҳбарига топшириқ берган. Ва орадан маълум муддат ўтгач, Шўрчи туман ЙFKDM раҳбари “Биз мавжуд барча муаммони тўлиқ бартараф этдик”, деб маълумот берган.  

Сурхондарё вилояти автомобиль йўллари бош бошқармаси бошлиғи қайси туман бошлиғига топшириқ берса, унинг ижросини шахсан назоратга олади. Мақсад ягона, у ҳам бўлса, соҳадаги мавжуд муаммоларни ўз вақтида, тезкорлик билан бартараф этиш, сансоларликларнинг олдини олиш ва энг асосийси, халқнинг розилигига эришишдан иборат. 

Бу гал ҳам худди шундай, бошқарма бошлиғи аҳолининг ҳақли эътирозларига сабаб бўлган ва мурожаатда келтирилган ушбу йўлнинг қай даражада таъмирланганини ва Шўрчи туман ЙFKDM раҳбарига берилган топшириқ ижросини текшириш мақсадида ҳудудга шахсан ўзи борган. Ва Шўрчи туман ЙFKDM раҳбарининг берган маълумоти ёлғон эканига гувоҳ бўлган.  Ҳақиқатан ҳам, воқеа жойида Шўрчи ТЙFKDM раҳбари ҳам, бирорта техника ёки бирорта ходим ҳам, ҳеч қандай тайёргарлик ҳам бўлмаган. Мазкур туман раҳбарининг халқни алдагани, қолаверса, ўз ишига масъулиятсизлик билан ёндашгани ва берилган топшириқни ўз вақтида бажармагани учун вилоят АЙББ бошлиғининг мавжуд ҳолатдан жаҳли чиққан, ҳаяжонга берилиб, қўполлик қилган, — дейилади бошқарма ахборот хизмати хабарида.  

Бошқарма раҳбарнинг сўкиши натижа берганини билдирди. 

Бошқарма бошлиғи ҳолатни шахсан ўз назоратига олди. Бугун ушбу йўл тўлиқ таъмирланди, — дейилади расмийлар изоҳида.