Қашқадарё вилоятининг Деҳқонобод тумани ҳокими сифатида ишлаб келаётган Акром Сулаймонов лавозимидан олинди. Бу ҳақдаги хабарни ҳокимнинг ўзи тасдиқлади.
Азизлар меҳнат фаолиятимда навбатдаги ўзгаришлар сабаб Деҳқонобод туманини тарк этдим. Қисқа вақт бўлса-да, менга ишонч билдириб, ўз яқини, ака-укасидек кўргани учун барча фахрийларимизга, ҳамкасбларимга, айниқса самимият ва меҳмондўстлик учун барча Деҳқонобод тумани аҳлига чин юракдан миннатдорлик билдираман.
Афсусдаман, барчангиздан узр сўрайман ҳали қилинадиган ишлар жуда кўп эди, қаердадир тугалланмаган ишларимиз қолди, ўйлайманки, янги ҳокимимиз бу ишларни давом эттиради.
Менга берган амалий ёрдамингиз, қўллаб-қувватлаганингиз, умуман, ҳамма ҳаммаси учун яна бир бор раҳмат сизларга. Яратган эгам барчангизни ўз паноҳида асрасин, — дейди туманнинг собиқ ҳокими Акром Сулаймонов.
Аниқлаштирилишича, бугун соат 15:00 да бўлиб ўтиши режалаштирилган Халқ депутатлари Деҳқонобод тумани кенгашининг навбатдан ташқари сессиясида вилоят ҳокими раҳбарлигида ташкилий масала кўриб чиқилади.
“Дарё” манбасининг қўшимча қилишича, Деҳқонобод туманига айни кунга қадар Кўкдала тумани ИИБ бўлимига раҳбарлик қилиб келаётган Шерзод Шокиров тайинланиши кутилмоқда.
Акром Сулаймонов фаолияти аввалидан бошлаб туманга 7 йил раҳбарлик қилган, айни кунда Қарши туманида ҳокимлик қилаётган Зоир Алиқуловнинг Деҳқонободдаги фаолиятига ишончсизлик билдириб, туманда ҳеч қандай ўзгаришлар бўлмаганини таъкидлаб келган. Тўрт ойлик ҳоким танқидига дучор бўлган Зоир Алиқулов Деҳқонобод туманига 2016 йилдан 2023 йил октябрь ойига қадар раҳбарлик қилган. 2023 йил октябрь ойида президент танқид қилиб, лавозимидан олган Қарши тумани ҳокими ўрнига тайинланиб, елкасига катта масъулият олганди.
Изоҳ (0)