Ғазо жанубида Исроил ҳаво ҳужуми оқибатида ҳалок бўлган она қорнидан қутқарилган чақалоқ 25 апрель куни ҳалок бўлди. Бу ҳақда BBC нашри хабар берди.
Манбада айтилишича, чақалоқ Сабрин ал-Сакани 21 апрель куни ярим тунда Рафаҳ касалхонасида кесарча кесиш амалиёти ёрдамида ўлик она танасидан ажратиб олинган. Шифокорлар чақалоқ ўпкасига ҳаво киритиш учун қўл помпасидан фойдаланишган.
25 апрель куни чақалоқ вафот этган. Сабрин деб исм қўйилган чақалоқ онаси ёнига дафн қилинган.
Ўтган ҳафта охирида Исроил ҳаво кучлари Сакани оиласи уйи ва унинг атрофидаги ҳудудларга ҳужум уюштирганда, чақалоқнинг онаси, унинг турмуш ўртоғи Шукри, уларнинг уч ёшли қизи Малак воқеа жойида ҳалок бўлган. Етти ярим ойлик Сабрин вафот этган онаси қорнида қолиб кетган.
Воқеа жойига етиб борган қутқарувчилар чақалоқнинг ҳануз тирик эканлигидан таажжубга тушишган. Касалхонада шифокорлар унга тезлик билан ёрдам кўрсатишган.
Чақалоқнинг аҳволи барқарорлашгач, у махсус инкубаторга жойлаштирилган. Шифокорлар ўшанда унинг аҳволини оғир деб баҳолаган.
Гўдак туғилганда атиги 1,4 килограмм вазнга эга бўлган. Оғир нафас олаётган бўлган. Шифокорлар бу ҳолатни муддатидан олдин туғилганлик сабаби билан изоҳлашган.
“Бу бола айни пайтда она қорнида бўлиши керак эди, лекин у бу ҳуқуқдан маҳрум этилган”, — деган Рафаҳдаги Амирлик касалхонасининг неонатал тез ёрдам бўлими бошлиғи доктор Муҳаммад Салама.
Изоҳ (0)