Асабийлашганда ёки кучли стрессни бошдан кечиргандан сўнг томоқда бир нарса тиқилиб қолгандек туюлиши, қизилўнгачнинг юқори қисмида ноқулай ҳислар пайдо бўлиши кўп кузатиладиган ҳолатдир. Бу вақтда бемор ўзини худди бирор нарсани юта олмаётгандек ҳис қилади. Бундай ҳолатнинг сабаби нима?
Томоқда бирор нарса тиқилиб қолгандек бўлиши ҳалқумда ёки унга яқин жойдаги органларнинг гипертрофияси ёки қалқонсимон без билан боғлиқ касалликлар туфайли юзага келади. Бундай ҳолат аввалдан мавжуд бўлган касалликларнинг аломат бўлиши мумкин, жумладан:
- Сурункали невроз;
- Тонзиллит;
- Эндемик ёки тугунли буқоқ;
- Қизилўнгач ёки ҳалқум саратони;
- Дисфагия — ютиш функциясининг ишдан чиқиши.
Шунингдек, ошқозон фаолиятидаги бузилишлар, жиғилдон қайнаши кабилар ҳам томоқда ноқулайлик ҳиссига сабабчи бўлиши мумкин.
Томоқда тиқилиш ҳисси сизни тез-тез безовта қилса, шифокор кўригидан ўтишни кечиктирмаслик лозим. Аввало, гастроэнтерологга мурожаат қилиш ва FGDS — қизилўнгач, ошқозон ва ўн икки бармоқли ичакнинг эндоскопик текширувини ўтказиш керак. Айнан фиброгастроскопия методи орқали ҳазм қилиш органларининг ҳолати ва функциясини тўлиқ текшириш мумкин.
Агар ошқозон ва қизилўнгачда ҳеч қандай касаллик аниқланмаса, эндокринологга мурожаат қилинг. Шифокор қалқонсимон безни ултратовушдан ўтказади, қон анализлари орқали тиреоид гормонларининг миқдорини аниқлайди. Агар эндемик буқоқ касаллиги аниқланса, тегишли даволаш курсини ёзиб беради.
Жаҳон соғлиқни сақлаш ташкилоти статистикасига кўра, бутун дунёда 665 миллиондан ортиқ аҳоли томоқда бирор нарса тиқилганлик ҳиссини берувчи эндемик буқоқ билан касалланган. Қалқонсимон безнинг ултратовуш текшируви патологияларни аниқламаса, лор мутахассисига мурожаат қилинг: эҳтимол сизда тонзиллит мавжуддир.
Ташхиснинг якуний босқичи бу неврологга ташриф буюришдир. Стресс ва сурункали неврозлар муаммонинг манбаи бўлиши мумкин. Турли гормонларнинг етказиб берувчиси, моддалар алмашинувининг асосий регуляторларидан бири бўлган қалқонсимон без соғлом одамларда ҳам баъзан ишдан чиқади, бунда доимий чарчоқ, куч ва кайфиятнинг йўқолиши, уйқусизлик, бефарқлик ва бош оғриғи каби аломатлар пайдо бўлади ва Ўзбекистон шароитида бу тез-тез учрайдиган ҳолат ҳисобланади.
Организмдаги йод танқислигини камайтириш учун йодланган туздан фойдаланинг. Тузни фақат тайёр овқат устига сепинг, чунки термик ишлов берганда йод парланиб кетади.
Изоҳ (0)