АҚШ Вакиллар палатаси Исроилга 26 миллиард долларлик ҳарбий ёрдам кўрсатишни назарда тутувчи қонун лойиҳасини маъқуллади. Фаластин президенти матбуот котиби Набиль Абу Рудейна бунга муносабат билдирди.
Рудейна Фаластиндаги тинчлик минтақа ва дунёда барқарорликка олиб келадиган ягона йўл эканини таъкидлади.
“АҚШнинг Исроилга ёрдами Фаластин халқига қарши эскалацияни кучайтиришни ва тажовузни ифодалайди, Исроилга минтақадаги барча мамлакатларни қамраб олиши учун уруш кўламини кенгайтиришда яшил чироқ ёқади”, — таъкидлади у.
Рудейна АҚШ Конгресси вакиллар палатаси томонидан Исроил фойдасига маъқулланган ёрдам пакетини қоралаб, бу АҚШнинг Яқин Шарқда хавфсизлик ва барқарорликка эришишдаги ишончини шубҳа остига қўйишини айтди.
“АҚШ Исроилнинг Ғарбий Соҳилга, жумладан, босиб олинган Қуддусга ҳужумларини оқловчи ўта ўнг ҳукуматни қўллаб-қувватлашда давом этмоқда ва фаластинлик қочқинларга ёрдам берган БМТнинг фаластинлик қочқинларга ёрдам кўрсатиш агентлигини (UNRWA) қўллаб-қувватлашни тўхтатди”, — деди Рудейна.
20 апрель куни АҚШ Конгрессининг Вакиллар палатаси режадан ташқари шанба кунги сессиясида Россия активларини Украина фойдасига мусодара қилиш, шунингдек, Исроил ва Тайванга ёрдам кўрсатиш тўғрисидаги қонун лойиҳасини қабул қилди. Россия АҚШ қарорига муносабат билдирди. Жумладан, Владимир Путиннинг матбуот котиби Дмитрий Песковнинг айтишича, АҚШ Вакиллар палатасининг Киевга ёрдам кўрсатиш ҳақидаги қарори АҚШни янада бойитиб, Украинани эса вайрон қилади.
Изоҳ (0)