Европа Иттифоқи давлатлари Брюсселдаги саммитда Исроилга ҳужуми учун Эронга қарши санкцияларни кенгайтиришга келишиб олди. Бу ҳақда Deutsche Welle хабар берди.
Биз Эронга қарши қўшимча санкциялар жорий этишга қарор қилдик, бу биз юбормоқчи бўлган аниқ сигналдир, — деди Европа кенгаши раҳбари Шарл Мишел.
Унинг таъкидлашича, Эрон халқаро изоляцияга тушиб қолиши керак.
Европа Кенгаши Эроннинг Исроилга ҳужумини қатъий ва сўзсиз қоралайди ва Исроил халқи билан тўлиқ бирдамлигини ҳамда Исроилнинг минтақадаги хавфсизлиги ва барқарорлигига содиқлигини тасдиқлайди, — дейилади йиғилишнинг биринчи куни якунида қабул қилинган декларацияда.
Чеклов чоралари дрон ва ракеталарга ҳам тегишли бўлади. Мишел ҳали янги санкциялар тафсилотларини очиқламаган.
Европа Иттифоқи Эрон ва унинг тарафдорларини ҳар қандай ҳужумларни тўхтатишга ҳамда томонларни максимал даражада вазминликка чақирмоқда.
Эрон 14 апрелга ўтар кечаси Исроилга ҳаво ҳужуми уюштирган эди. Исроил армиясига кўра, 170 та дрон, 120 дан ортиқ баллистик ракеталар ва 30 дан ортиқ қанотли ракеталар мамлакатга ҳужум қилишга уринган, бироқ Исроил ва унинг иттифоқчилари уларнинг 99 фоизини уриб туширишга муваффақ бўлган. Эрондан ташқари, Исроилга ҳужумлар Яман ҳусийлари ва Ироқ томонидан амалга оширилган.
17 апрель куни Исроил ОАВлари мамлакат ҳужумга жавоб қайтаришга қарор қилгани, аммо жавоб зарбаси учун ҳали муддат белгиланмагани ҳақида хабар берган.
Изоҳ (0)