Болалар омбудсмани вояга етмаган фарзандлари Қозон шаҳрида қаровсиз қолиб кетган аёлга ёрдам кўрсатди.
Қайд этилишича, котибиятига 19 февраль куни Наманган вилоятида яшовчи Х.Х. (аёл) дан мурожаат келиб тушган. Мурожаатда аёл Россиянинг Қозон шаҳрида ўзининг 12 ёшли қизи Н.У., 9 ёшли ўғли Ж.Н. ҳамда турмуш ўртоғи К.Г. билан бирга яшаганини маълум қилган.
Х.Х. 2024 йилнинг 12 февраль куни эри ўғлини ургани сабабли бола полиция томонидан касалхонага жойлаштирилганини, хорижда яшашга оид тегишли ҳужжатлар тақдим этса, полиция болани онага қайтаришини маълум қилганини, ҳужжатлардаги камчиликларни бартараф этиш учун Қозоғистон ҳудудига ўтганини ҳамда тақиқ туфайли Россияга қайта кира олмасдан Ўзбекистонга қайтиб келганини билдирган. Аёл Қозон шаҳрида қаровсиз қолиб кетган болаларини Ўзбекистонга қайтаришда амалий ёрдам сўраган.
Мазкур ҳолат болалар омбудсмани сўрови асосида Ташқи ишлар вазирлиги, Ижтимоий ҳимоя миллий агентлиги ва Ички ишлар вазирлиги томонидан ўрганилган.
Ўзбекистоннинг Қозон шаҳридаги Бош консулхонаси ходимлари томонидан олиб борилган ўрганиш натижасида ИИВ органлари билан алоқа ўрнатилган. Аниқланишича, вояга етмаган Ж.Н. ва Н.У. лар Қозон шаҳридаги 41-сонли ўрта мактабда таълим олгани ва мактаб ҳудудида отаси Г.К. томонидан ўғлига нисбатан жисмоний куч ишлатилгани сабабли, улар 18-сонли болалар шифохонасида тиббий кўрикдан ўтказилган ва даволанишга эҳтиёж мавжуд эмаслиги аниқланган.
Шу билан бирга, Бош консулхона томонидан Қозон шаҳри Вахитов ва Приволжск тумани васийлик органи билан музокаралар олиб борилиб, васийлик органи ота-онаси Россияга киришга имконияти йўқлигини инобатга олган ҳолда болаларни Ўзбекистонга юборишга рухсат берган.
Идораларнинг изчил ва ўзаро тезкор чоралари натижасида, ИИВ томонидан 15 апрель куни вояга етмаган Н.У. ва Ж.Н. Ўзбекистонга қайтариб олиб келинган ва онаси қарамоғига топширилган.
Аввалроқ 2023 йилда бола ҳуқуқлари бўйича вакил номига бола ҳуқуқлари ва қонуний манфаатлари бузилиши тўғрисида фуқаролар, болалар ҳамда уларнинг қонуний вакиллари томонидан жами 443 та мурожаат қабул қилиниб, ўрганилгани тўғрисида хабар берилганди.
Изоҳ (0)