Россияда энага унга ташлаб кетилган икки ёшли ўзбекистонлик болани полицияга топшириб юборгани тўғрисида хабар берилганди. Болалар омбудсмани мазкур ҳолат юзасидан маълумот берди.
Болалар омбудсманига келиб тушган мурожаатда фуқаро V.Д.нинг 2022 йилда туғилган невараси З.Н. ҳозирда Россиянинг Люберецкий туманидаги васийлик органида 1 ойдан бери сақланаётгани, бунга сабаб, боланинг онаси З.А. болани энагага қолдиргани ва уни олиб кетмагани учун энага полиция чақиргани, полиция эса болани васийлик органига топширгани билдирилган. Буви васийлик органи неварасини ташландиқ бола сифатида расмийлаштириб, унга янгидан исм-фамилия берилганидан хабар топган, неварасининг Ўзбекистонга қайтарилишида амалий ёрдам сўраган.
Болалар омбудсмани сўрови асосида Ташқи ишлар вазирлиги ва Ижтимоий ҳимоя миллий агентлиги томонидан мазкур мураккаб ҳолат комплекс ўрганилмоқда.
ТИВнинг ўрганишига кўра, вояга етмаган Н.З. ҳеч бир ҳужжатларсиз вақтинчалик парвариш қилиш марказига олиб кетилган бўлиб, шу туфайли Россия томони боланинг онаси билан муносабатларини тасдиқлаш учун ДНК тестини тайинлаш орқали судда боланинг шахсини аниқлаш кераклиги маълум қилинган.
Ҳозирда боланинг онаси З.А. қизи Н.З. билан оилавий муносабатларни (она ва фарзанд) расмий тасдиқлаш учун Россияда тегишли тартибда судга ариза берган.
Ўз ўрнида “Инсон” ижтимоий хизматлар маркази томонидан фуқаро V.Д. нинг набираси З.Н.ни унинг васийлигига ўтказиш учун зарур ҳужжатлар Россиянинг васийлик ва ҳомийлик органларига юборилган.
Ҳозирда Болалар омбудсмани, Ижтимоий ҳимоя миллий агентлиги ва Ички ишлар вазирлиги томонидан вояга етмаган З.Н. ни Россиядан Ўзбекистонга қайтариш чоралари кўрилмоқда.
Аввалроқ 2023 йилда бола ҳуқуқлари бўйича вакил номига бола ҳуқуқлари ва қонуний манфаатлари бузилиши тўғрисида фуқаролар, болалар ҳамда уларнинг қонуний вакиллари томонидан жами 443 та мурожаат қабул қилиниб, ўрганилгани тўғрисида хабар берилганди.
Изоҳ (0)