Париж—2024 ташкилий қўмита раҳбари Сенада сувнинг ифлосланиш даражасидан хавотирда эканини маълум қилди.
Бир оз аввал Surfrider Foundation нотижорат экологик ташкилоти дарёдаги сувни ўрганишни амалга оширган эди. 2023 йил сентябрь ойи охири ва 2024 йил март оралиғида олинган 14 та намунадан 13 таси дарёдаги бактериялар билан ифлосланишнинг рухсат этилган даражадан ошиб кетганини кўрсатди.
Сена дарёсида Олимпиада баҳсларининг сузиш ва триатлон бўйича мусобақалар ўтказилиши белгиланган.
“Бу энг катта муаммолардан бири ва биз уни ҳал қилиш учун астойдил ҳаракат қилмоқдамиз. Ҳукумат дарёдаги сувни тозалашга қаратилган йирик инвестиция дастурини амалга оширмоқда ва Олимпия мероси нуқтаи назаридан, бу лойиҳа шунчаки бетакрор.
Триатлон Сенада бўлиб ўтишига ишончимиз комил ва фавқулодда вазиятлар учун режалар мавжуд.
Мусобақалар ёмғир туфайли кечиктирилиши мумкин, бу сув сифатига таъсир қилади. Триатлон ўйинлари бошланиши режалаштирилганлиги сабабли об-ҳавонинг яхшиланишини кутишимиз мумкин.
Мусобақаларни тақиқлаш бўйича якуний қарор Халқаро федерация қоидалари билан белгиланади. Албатта, биз бундан қочишни истаймиз”, — дейди Тони Эстанга.
Париждаги Олимпиада ўйинлари 26 июлдан 11 августгача бўлиб ўтади. Триатлон мусобақалари 30—31 июль ва 5 август кунлари, очиқ сувда сузиш мусобақалари 8—9 август кунларига белгиланган.
Изоҳ (0)