2024 йилги Париж Олимпиадасида иштирок этадиган россиялик ва Беларуслик спортчилардан ягона нейтрал форма кийиш талаб қилинмайди. Бу ҳақда Халқаро олимпия қўмитаси баёнотига асосланиб, “ТАСС” хабар берди.
“Нейтрал спортчилар индивидуал тарзда мусобақаларда қатнашадиган бўлгани учун улардан ягона форма талаб қилмайди. Бироқ барча мусобақа формалари ва мусобақалардан ташқари кийимлар ХОҚ Ижроия кенгашининг 2023 йил 8 декабрдаги нейтрал спортчиларнинг мусобақаларда иштирок этиш тамойилларида кўрсатилган ягона кўрсатмаларга мувофиқ бўлиши керак”, — дейилади Халқаро олимпия қўмитаси баёнотида.
Париж Олимпиадаси доирасидаги баҳслар 26 июлдан 11 августга қадар бўлиб ўтиши белгиланган. Ушбу баҳсларда Россия ва Беларусь спортчиларига чекловлар киритилиши айтилган. Парижда улар фақат нейтрал мақомда чиқишлари мумкин бўлади, уларга ўз мамлакатлари билан ҳар қандай рамзни кўрсатиш ва жамоавий мусобақаларда қатнашиш тақиқланади. Россия расмийлари ХОҚ қарорини камситиш ва Олимпия тамойилларига зид деб ҳисоблашини билдирган.
Изоҳ (0)