Маданият вазирлиги “Овоз” лойиҳаси иштирокчиларига тўланадиган гонорар миқдори хусусида тарқалган хабарларга муносабат билдирди.
Қайд этилишича, Маданият вазирлиги ҳамда Talent shоw масъулияти чекланган жамияти ташаббусига кўра йўлга қўйилаётган Тhе Voice оf Uzbekistan лойиҳасидан мамлакатдаги иқтидор эгаларини қидириб топиш, уларга истеъдодини юзага чиқариш учун имконият яратиш, “устоз-шогирд” анъанасини мустаҳкамлаш каби эзгу мақсад кўзланган.
Тhе Voice оf Uzbekistan телешоусини Ўзбекистонда ўтказиш бўйича Буюк Британиянинг ITV Studios Limited компаниясига тегишли бўлган Тhе Voice (“Голос”) лицензияси (франшизаси) Talent shоw масъулияти чекланган жамияти томонидан 5 миллиард сўмдан ортиқроқ маблағ эвазига сотиб олинган ҳамда телелойиҳани ташкиллаштириш билан боғлиқ бошқа харажатлар амалга оширилган.
Телелойиҳани тўлиқ ишга тушириш ва таклиф этилган иштирокчиларнинг устозлари, созанда ва бошқа ташкилотчиларга гонорар тўловларини тўлаб бериш мақсадида Маданият вазирлиги томонидан 2 миллиард сўм миқдорида маблағ ажратилиши режалаштирилган. Харажатлар миқдори солиқ ва бошқа йиғимларни ҳисобга олган ҳолда кўрсатиб ўтилган.
Вазирлик Ўзбекистон Конституциясининг 42-моддасида ҳар ким муносиб меҳнат қилиш ва меҳнати учун адолатли ҳақ олиш ҳуқуқига эга экани белгилаб қўйилганини эслатиб, шунга кўра, телелойиҳадаги устозлар, созандалар ва бошқаларга меҳнати учун муносиб ҳақ тўланиши назарда тутилганини билдирди. Маданият вазирлиги томонидан режалаштирилган мазкур харажатлар телелойиҳани ташкил этиш билан боғлиқ харажатларнинг 30 фоизини ташкил этади.
Изоҳ (0)