Madaniyat vazirligi “Ovoz” loyihasi uchun 2 mlrd so‘m ajratadi

Madaniyat vazirligi “Ovoz” loyihasi ishtirokchilariga to‘lanadigan gonorar miqdori xususida tarqalgan xabarlarga munosabat bildirdi.

Qayd etilishicha, Madaniyat vazirligi hamda Talent show mas’uliyati cheklangan jamiyati tashabbusiga ko‘ra yo‘lga qo‘yilayotgan The Voice of Uzbekistan loyihasidan mamlakatdagi iqtidor egalarini qidirib topish, ularga iste’dodini yuzaga chiqarish uchun imkoniyat yaratish, “ustoz-shogird” an’anasini mustahkamlash kabi ezgu maqsad ko‘zlangan.

The Voice of Uzbekistan teleshousini O‘zbekistonda o‘tkazish bo‘yicha Buyuk Britaniyaning ITV Studios Limited kompaniyasiga tegishli bo‘lgan The Voice (“Golos”) litsenziyasi (franshizasi) Talent show mas’uliyati cheklangan jamiyati tomonidan 5 milliard so‘mdan ortiqroq mablag‘ evaziga sotib olingan hamda teleloyihani tashkillashtirish bilan bog‘liq boshqa xarajatlar amalga oshirilgan.

Teleloyihani to‘liq ishga tushirish va taklif etilgan ishtirokchilarning ustozlari, sozanda va boshqa tashkilotchilarga gonorar to‘lovlarini to‘lab berish maqsadida Madaniyat vazirligi tomonidan 2 milliard so‘m miqdorida mablag‘ ajratilishi rejalashtirilgan. Xarajatlar miqdori soliq va boshqa yig‘imlarni hisobga olgan holda ko‘rsatib o‘tilgan.

Vazirlik O‘zbekiston Konstitutsiyasining 42-moddasida har kim munosib mehnat qilish va mehnati uchun adolatli haq olish huquqiga ega ekani belgilab qo‘yilganini eslatib, shunga ko‘ra, teleloyihadagi ustozlar, sozandalar va boshqalarga mehnati uchun munosib haq to‘lanishi nazarda tutilganini bildirdi. Madaniyat vazirligi tomonidan rejalashtirilgan mazkur xarajatlar teleloyihani tashkil etish bilan bog‘liq xarajatlarning 30 foizini tashkil etadi.