Ўзбекистон халқ артисти Фаррух Зокиров журналист Насиба Фахритдинованинг “Тет-а-тет” лойиҳасига берган интервьюсида бир нечта мамлакат президентларидан қимматбаҳо совғалар, хусусан, тилла соатлар олгани ҳақида сўзлаб берди.
— 1994—95 йиллар эди. Тўрт мамлакат президентлари олдида куйладим. Саҳнада Ислом Абдуғаниевич билан Туркманистон президентининг менга қараб гаплашишаётганига кўзим тушди. Бир маҳал улар иккаласи ҳам ўрнидан туриб, мен томонга юра бошлади. Дарҳол ичимдан: “Ҳозир мендан туркман тилида қўшиғинг борми?” деб сўрашади, деган ўй ўтди. Шокда ва ҳаяжондаман. Рэпертуаримда туркман тилидаги қўшиқ йўқ эди. Президентлар тобора саҳнага яқин кела бошлади. Ўртамизда 5 метрча масофа қолганида туркманбоши бир қўлини тепага кўтариб, соатини ечди ва келиб, мени қучоқлади. Мен эса ҳамон шокдаман. У қулоғимга “Биз сизни жудаям ҳурмат қиламиз”, деди ва соатни менга узатди. Соат анчагина оғир, тахминан, ярим кило тилладан ясалган эди. Жудаям чиройли ишланган соат, уни ҳалигача тақаман, — дейди Фаррух Зокиров.
Фаррух Зокировнинг айтишича, давлат раҳбарлари томонидан тақдим этилган совғалар унда талайгина.
— Афғонистонда ҳам шунга ўхшаш ҳолат юз берган. 16 апрель — туғилган кунимда президентлар олдида чиқиш қилганман. Шунда Афғонистоннинг ўша пайтдаги президенти Муҳаммад Нажибулла саҳнага чиқиб, “Озгина русча гапира оламан, туғилган кунингиз билан табриклайман”, деган ва қўлимга қандайдир қутини тутқазган. Давлат раҳбаридан совға олиш, албатта, ҳаяжонли ва шарафли. Қўшиқ куйлаб бўлиб, совғанинг нима эканлигига қизиқиб, қутини очсам, у ерда тилла соат бор экан. Орадан вақт ўтди. Ўғлим ўша соатни тақиб турсам майлими, деб сўради. Розилик билдирдим. Бир пайт у “Дада, соат қўлимдан ерга тушиб кетди ва чилпарчин бўлди”, деб қолди. Мен ўзим ҳам соатларимни кўпинча қўлимдан тушириб юборардим, бироқ ҳеч қачон бунақа чилпарчин бўлиб кетмаган. Ўша куни эса биз Афғонистонда фожиа юз бергани ҳамда менга соат совға қилган президент ўлдирилгани ҳақида хабар топдик, — дейди Фаррух Зокиров.
Изоҳ (0)