Тармоқларда Андижон вилоятининг Шаҳрихон тиббиёт бирлашмасига қарашли УТТ (Ултратовуш текшируви) хонасига камера ўрнатилганлиги акс этган видео тарқалди.
“Фақат бир жиҳат қизиқ. Наҳотки, бирлашмадаги юзлаб зиёлилар беморларнинг тўлиқ бўлмаса-да, ечиниб текширувдан ўтадиган жойга камера ўрнатиш мумкин эмаслигини билмаган бўлса?”, — дейилади хабарда.
Ҳолат юзасидан Шаҳрихон туман тиббиёт бирлашмасининг маълум қилишича, УТТ хонасига камера ўрнатилган.
“Ҳақиқатдан ҳам бирлашма томонидан 2024 йилда муассасада ходимларнинг иш фаолиятини қатъий назоратга олиш, беморлар ва тиббиёт ходимлари ўртасидаги муносабатларни тартибга солиш, содир бўлган нохуш ва криминал ҳолатларни ўрганишга аниқлик киритиш мақсадида барча хоналарга камералар ўрнатилиши режалаштирилди.
Ҳозирда муассасада камераларни ўрнатиш ишлари олиб борилмоқда. Ижтимоий тармоқларда УТТ хонасига ўрнатилган камера ишчи ҳолатида бўлмаган, техник ходимлар томонидан хизмат кўрсатиш хонаси йўналишини тушунмаслиги оқибатида ўрнатилган”, — дейилади бирлашма изоҳида.
Қўшимча қилинишича, ушбу ҳолат бартараф этилган ва муассасада камералар ўрнатилиши лозим бўлган жойларнинг барчаси қайта ўрганиб чиқилган.
Андижон вилояти соғлиқни сақлаш бошқармаси бундай ҳолатга йўл қўйган масъул раҳбарларга нисбатан қандай жазо қўлланилгани юзасидан маълумот бермаган.
Изоҳ (0)