Ижтимоий тармоқларда Тошкент шаҳрида жойлашган аквапарклардан бирининг аёллар кийиниш хонасига кузатув камераси ўрнатилгани тасвирланган видео тарқалди. “Дарё” аквапарк маъмурияти билан боғлаб, мазкур ҳолатга ойдинлик киритди.
Компания менежерига кўра, мазкур камера 12 йилдан бери шу жойда туради.
“Бу камера ўғирлик ҳолатлари содир бўлганида кўриш ва шундай кейин ариза бериш учун 12 йилдан бери турибди”, — дейди у.
Шунингдек, унинг айтишича, камерани фақат аёллар назорат қилади ҳамда эркаклар унга яқин ҳам йўлатилмайди.
Видеокузатув эркаклар кийиниш хонасига ҳам ўрнатилган. Бунга ҳар йилги текширув давомида рухсат берилган ва шу вақтга қадар бирор муаммо кузатилмаган. Менежер текширув ўтказадиган идора номини ошкор этмаган.
Пойтахт ИИББ ҳам ҳолатга ўз муносабатини билдирди. “Ходимларимиз бассейнга ташриф буюрувчиларнинг фото ёки видеолари сақланиши ёки тарқатилиши бўйича телефонларни текширди. Ҳеч нарса аниқланмади”, — дейилади хабарда.
Аквапарк ходимлари билан бассейнга келувчиларнинг шахсий фото ёки видеоларини тарқатмасликнинг муҳимлиги ҳақида профилактик суҳбат ўтказилган. “Бассейннинг кийиниш хонасида кийим алмаштириш кабиналари бор ва у ерда камералар йўқ. Камералар ташриф буюрувчиларнинг шахсий буюмлари сақланадиган шкафлар қисмига ўрнатилган”, — дейилади идора хабарида.
Қизлар ётоқхонасига ўрнатилган яширин камера воқеаси
Институт талаба қизларидан бири 4 апрель куни вазирлик Telegram каналининг мулоқот ботига қизлар яшайдиган талабалар турар жойи хоналаридан бирига яширинча кузатиш камераси ўрнатилгани ҳақида маълумот берганди. Фарғона вилоят ИИБ воқеа юзасидан текширув ўтказди. Ҳолат тасдиқлангач, Олий таълим, фан ва инновациялар вазирлиги ушбу воқеа юзасидан хизмат текшируви ўтказилишини ва айбдор шахслар аниқлангач, уларга нисбатан тегишли чоралар кўрилишини маълум қилди. Шундан сўнг бевосита жараёнда иштирок этиб, хизмат вазифасини суиистеъмол қилган 4 нафар масъул ходим, жумладан, воқеада бевосита иштирок этган проректор эгаллаб турган лавозимидан озод этилган ва бир нафар мутахассисга интизомий жазо чораси қўлланилди.