Қўқон педагогика институтининг қизлар ётоқхонасига камера ўрнатилгани аниқлангани тўғрисида хабар берилганди. Фарғона вилоят ИИБ ҳолат юзасидан терговга қадар текширув ўтказилаётганини маълум қилди.
Қайд этилишича, 2 апрель куни Қўқон давлат педагогика институти 1-ётоқхонасида яшовчи В.З. “102” қисқа рақамига мурожаат қилиб, ўз мурожаатида талабаларнинг ечиниб-кийиниш хоналарига кузатув камераси ўрнатганидан норозилигини билдирган. Мазкур хабар шу куннинг ўзида тегишли тартибда рўйхатга олинган.
“Ҳозирда мазкур ҳолат юзасидан Қўқон шаҳар ИИБ томонидан терговга қадар текширув ҳаракатлари олиб борилмоқда. Натижаси бўйича қўшимча маълумот тақдим этилади”, — дейилади муносабатда.
“Kun.uz” нашри Қўқон давлат педагогика институтида ўқувчи бир неча талаба қизнинг мурожаатини эълон қилганди. Талабаларнинг айтишича, 1 апрель куни уларни референдум тарғибот тадбиридан зудлик билан чақириб, ётоқхонадаги хонани очиб бериш сўралган. “Wi-Fi сигнали йўқолиб қолаётгани сабабли уни кучайтирувчи мослама ўрнатилиши”ни айтишган.
Қизлар кейинроқ ўрнатилган мосламани ечиб олиб, мутахассисларга олиб бориб кўрсатган. Улар бу мослама яширин камера эканини айтган. Камера овоз ва тасвирни флеш-дискка ҳам ёзиб олишини, тармоқ орқали бошқа қурилмага узатиши маълум қилинган. Яъни хонани бу камера орқали онлайн кузатиб туриш имкони ҳам бўлган. Қизлар камерага бириктирилган 128 Гб ҳажмдаги флеш-дискни очиб ўқитиб кўришганида кийим алмаштираётгани ҳам тасвирга тушганига гувоҳ бўлишган.
Олий таълим, фан ва инновациялар вазирлиги ҳам ҳолатга муносабат билдириб, вазирликнинг Фарғона ҳудудий бошқармаси масъуллари томонидан Қўқон педагогика институтига бориб, вазият ўрганилганини маълум қилган.
Изоҳ (0)