Ижтимоий тармоқлар орқали актриса Муҳаббат Абдуллаева халққа мурожаат қилиб, ёлғиз фарзанди Таиландда автоҳалокатга учрагани, уни касалхонада даволатиш учун катта маблағ кераклигини айтиб, халқдан ёрдам сўради. “Дарё” мухбири актриса билан боғланиб, аслида вазият қандай бўлгани ҳақида сўради.
— Қизим Карина Таиландда докторантура бўйича ўқиб, амалиёт ўтаётган эди. У ерда мотоцикл ва велосипедлардан транспорт сифатида фойдаланилади. Мотоциклда кетаётганда бошқарувни йўқотиб, боши билан йиқилган. Ўзи-ку ҳеч нарсани эслолмайди, фақатгина транспорт воситасига ўтирганини билади холос.
31 март куни сьёмкада эдим. Таиланд элчихонасидаги бир йигит: “Қизингиз аварияга учради, аҳволи оғир, комада”, деб хабар ёзди. Нима қилишимни билмай қолдим. Сьёмкани тўхтатай десам, ҳамма ишлаймиз деб келган. Гапиряпман-у, хаёлим қизимда. Энг ёмони бундай вазиятда фарзанд узоқда бўлса, жуда қийин экан. Қанчалик хоҳламай барибир ўша вақтда қизимнинг ёнига боришим имконсиз эди. Ундан кейин элчихонадаги йигит қўнғироқ қилиб, Каринанинг аҳволи ҳақида гапирди. Мен тамоман шок ҳолатига тушиб бўлгандим.
Карина ёлғиз фарзандим, жуда кичиклигидан бошлаб тил ўрганишга қизиққан. 18 ёшидан буён Германияда яшайди, бакалаврдан то докторантурагача ўз кучи билан ўқиди. Менга ҳеч қачон қийинчилик туғдирмаган, ҳамма муаммоларини ўз ҳал қиларди.
Аввалига бу ҳақида айтишни истамадим, ҳаммасини ичимга ютиб, сабр қилишга ҳаракат қилдим. Аммо элчихона ходими бу касалхонада даволаниш учун кунига 955 АҚШ долларидан тўлов қилиш кераклигини айтди. Мен театр ва кино актрисасиман. Тўй хизматларига чиқмайман, даромадим ҳам у қадар юқори эмас. Шунда ҳам одамлардан уялиб, муаммога ечим излашга ҳаракат қилдим. Имконини қилолмагандан кейин қизим учун халқдан тиланиб пул сўрашга мажбур бўлдим. Рости шу кунгача бировдан ёрдам кутган инсон эмасдим, аммо она боласи учун тиланчилик қилишга ҳам рози бўларкан.
Автоҳалокат оқибатида қизимнинг елкалари, қовурғаси ва энг ёмони боши жиддий жароҳат олган. Биринчи операцияси муваффақиятли ўтди, энди кейингиларига тайёрлашяпти. Энг ёмони бошига қон қуйилгани ва очиқ жароҳатлари борлиги учун уни Тошкентга олиб келиш ҳам имконсиз экан. Нима бўлган тақдирда ҳам соғайиб, бағримга қайцин. Қизим эндигина 37 ёшни қаршилади. Ногирон бўлиб қолмасин, деб дуодаман.
Шу ўринда халқимизга ҳам миннатдорлик билдираман. Чунки энг қийин вазиятда мени қўллаб-қувватлашди. Моддий томондан қўллаб-қувватлашяпти, дуо қилишяпти. Бу менга куч бағишлайди, — дейди актриса Муҳаббат Абдуллаева.
Қуйида видеони тўлиқ ҳолда томоша қилишингиз мумкин.
Изоҳ (0)