23 сентябрь куни Ўзбекистонда хизмат кўрсатган артист Равшан Намозов узоқ давом этган оққон хасталиги сабаб вафот этди. «Дарё»нинг YouTube’даги каналида марҳум ижодкорнинг оила аъзолари билан суҳбат ташкил этилди. Яқинлари Равшан Намозовнинг кўпчиликка ошкор этилмаган сирлари, умрининг сўнгги кунлари ва армонлари ҳақида сўзлаб беришди.
«Равшан Намозов театр саҳнасида туғилган»
— Намозовлар оиласига санъат бегона эмас. Истеъдод қондан қонга ўтиб, шаклланиб бораверади. Қайнотам Абдураҳмон Намозов ҳам Ўзбекистонда хизмат кўрсатган артист, машҳур театр актёри бўлган. Турмуш ўртоғим туғилмасидан аввал қайнотам қайнонам билан театрда танишиб қолишган. Уларнинг иккиси ҳам Термиздаги Маннор Уйғур номидаги мусиқали театрда ишлашарди. Қайнонам турмуш ўртоғимга ҳомиладор чоғида ҳам спектаклларда иштирок этаркан. 1961 йилнинг 10 июнь куни «Равшан ва Зулҳумор» спектакли намойиш этилаётганда, қайнонамни тўлғоқ тутиб қолган. Ўшанда қайнонам Зулҳумор ролини ижро этаётган бўлган. Хуллас, турмуш ўртоғим туғуруқхонада эмас, театрда дунёга келган. «Равшан ва Зулҳумор» спектаклига сабаб унга Равшан деб исм қўйишган.
Аммо тақдир сабаб қайнотам турмуш ўртоғимнинг онаси билан ажрашиб кетган. Саида қайнонам икки қизлари билан кетган, турмуш ўртоғим эса отасининг қўлида қолган. Бир неча йилдан кейин қайнотам уйланган ва ука-сингиллари дунёга келган, — дейди марҳум ижодкорнинг турмуш ўртоғи Муҳаббат Намозова.
«Акамнинг машҳур инсон эканлигини билмасдик»
— Акам билан ёшимиз ўртасида катта фарқ бор. Ижодни бошлаган вақтида мен анча ёш эдим. Шунинг учун санъатга кириб келган йилларини аниқ эслолмайман. Ёдимда қолгани, акам ва опамнинг хонаси алоҳида бўларди. Мен кичик бўлсам ҳам уларнинг хонасида қоламан, деб хархаша қилардим. Чунки акам билан вақт жуда қизиқ ўтарди. Акам билан вақт қандай ўтганини билмай қолардик. Ўша вақтда ҳам акамнинг хонасида мусиқий асбоблар кўп бўларди. Ёш бўлсак ҳам уларга тегмасдик. Улар акам учун қадрли эканлигини яхши билардик. 1990 йилларда акам Термизда анча танилган санъаткор эди. Аммо мен учун оддий ака эди, бирор марта оилада унинг машҳурлиги сезилмасди. У хокисор инсон эди. Шу боисдан ҳам унинг бизни тарк этишига ишонмасдим. Баъзан қанийди акам ёмон бўлганида, дилимизни оғритганида эди, унинг ўлимидан шунчалик қайғуга тушмасмидик, деб ўйлаб қоламан, — дейди Равшан Намозовнинг синглиси Зулфия Намозова.
«Соч-соқол сабаб ‘запретъга учради»
— Турмуш ўртоғим ҳамиша саҳнада жон берсам, деб орзу қиларди. Мен ҳам санъаткорман, аммо ижодкорлар орасида Равшан Намозовдек инсон камдан кам учрайди. У асл санъатнинг шайдоси эди. Касалхонада оғир аҳволда ётганида ҳам қўлида худди гитарасини ушлаб ётгандек бўларди. «Ўғилларингиз гитарангизни олиб келсинми?» десам «Йўқ, кўз тегиб қолади», деб кулиб жавоб берганди. У кийим-кечак ва ҳашаматга қизиқмасди. Топган пулининг бир қисмини рўзғорга қолганини эса янги мусиқий асбоб сотиб олишга сарфларди. «Сен хафа бўлма, менинг биринчи аёлим гитарам, иккинчиси машинам», деб ҳазил қиларди. Ҳақиқатан ҳам мусиқий асбобларини ҳеч кимга ишонмасди. Ҳатто уларнинг қайси ҳолатда турганини ҳам яхши биларди. Афсуски, турмуш ўртоғимни эркин ижод қилишга, халққа тақдим этишга қўйишмади. Умрининг сўнгги йилларида «Мен катта «багаж» билан кетяпман, уларни мухлисларга етказолмадим», деган гапни кўп айтарди.
Равшан Намозов 2017 йилга қадар соч-соқоли сабаб «запрет»га учради. Кичик сабаб бир-бирига уланиб, бир инсоннинг умрини еди. 1996 йили Равшан ака Мустақиллик байрамида чиқиши керак эди. Унинг имижи бошқаларга ўхшамаслиги, сочи ва соқолини ўстириб юришини яхши билишарди. У мана шу имижи билан ўзбек фольклор-рок санъатини 156 та давлатга танитиб келган эди.
— Хуллас, Мустақиллик байрамига чиқишдан аввал «Соч-соқолингни оласан», дейишган. «Узр, мен ололмайман, чунки уни бир неча ойдан бери ўстиряпман. Уни Хивада олинадиган «Севги қўшиғи» мусиқий фильми учун махсус ўстирганман», деб тушунтиришга ҳаракат қилган. Ёнида Насиба Абдуллаева, Кумуш Раззоқова каби ҳамкасблари бўлган. Улар бир флакон соч лакини сепиб, узун сочларини йиғиб, калтадек кўрсатишган. Соқолини олишга эса аранг кўндиришган. Оиламиз билан концертни кутиб ўтирсак, турмуш ўртоғимнинг қўшиғи янграган, аммо бошқа одам саҳнага чиққан. Ҳатто соқолини олиб, узун сочини яширишганда ҳам уни саҳнага қўйишмаган. Уни қўшиғига бошқа эркак оғзини қимирлатиб саҳнага чиққан. Бу ҳолатни телевизор қаршисида кўриб, нима бўлганини англолмай қолганмиз.
Ана шундай кейин бундай муаммоли вазиятлар бир-бирига уланиб кетаверди. Энг катта зарбани ўша пайтдаги «Ўзбекнаво»нинг раҳбарларидан бири (исми ёдимда йўқ) берди. Шу киши турмуш ўртоғимга тўсқинлик қилиб, кўп стрессларга сабаб бўлди, — дейди Муҳаббат Намозова.
Суҳбатни тўлиқ ҳолда қуйида томоша қилишингиз мумкин.
Изоҳ (0)