Ўзбекистон бош консули Зафарбек Аҳмедов “Манас” халқаро аэропортининг Ўш филиали директори Тимур Маданбеков билан учрашди. Бу ҳақда “Дунё” агентлиги хабар берди.
Мулоқот давомида Ўзбекистон ва Қирғизистон ўртасида турли даражадаги алоқалар, хусусан, савдо-иқтисодий, таълим, фан, маданият ва туризм соҳаларидаги ўзаро ҳамкорлик жадал ривож топаётгани қайд этилди.
Ўзбекистоннинг тарихий шаҳарларига саёҳат қилиш ёки даволаниш мақсадида бораётган Қирғизистон фуқароларининг сони йилдан йилга ошаётгани, шунингдек, ёзги мавсумда Қирғизистонга дам олиш учун келаётган ўзбекистонликлар ҳам кўпайгани таъкидланди. Бироқ Ўш ва унга қўшни вилоятларни Ўзбекистоннинг Тошкент ва бошқа тарихий шаҳарлари билан боғловчи қулай транспорт-логистика тизимининг йўқлиги туризмни янада ривожлантиришда асосий муаммолардан бири бўлиб қолмоқда.
Шулардан келиб чиққан ҳолда қирғиз томони Тошкент—Ўш—Тошкент йўналиши бўйича авиақатновларни йўлга қўйиш таклифини билдирди.
Учрашув якунида икки мамлакат фуқаролари учун қатор қулайликларни тақдим этадиган ва ўзаро туристлар алмашинувини оширишга хизмат қиладиган ҳаво қатновларини йўлга қўйиш бўйича Ўзбекистоннинг тегишли ташкилотлари билан алоҳида учрашув ташкил этиш тўғрисида келишиб олинди.
Февраль охирларида “Ўзавиация” агентлиги Қирғизистоннинг Tez Jet авиакомпаниясига Ўзбекистонга мунтазам парвозларни амалга оширишга рухсатнома берилганини эълон қилганди.
Изоҳ (0)