Исроил Эроннинг ҳаво зарбаларидан қўрқиб, хориждаги бир қанча дипломатик ваколатхоналарини ёпди. Бу ҳақда Ynet нашри хабар берди.
Исроил ҳарбий ҳаво кучлари 1 апрель куни Эроннинг Дамашқдаги консуллигига ракеталар учирди, оқибатда Эрон Ислом инқилоби гвардияси корпусининг генераллари ҳалок бўлди. Бунга жавобан Эрон Исроилга жавоб қайтаришидан огоҳлантирди. Шу сабабли Исроил бир қанча давлатлардаги элчихоналарини вақтинча ёпди.
Элчихоналарни ёпиш қарорини Исроил Ташқи ишлар вазирлиги Бош хавфсизлик хизмати билан келишган ҳолда қабул қилган. Миссия ходимларидан ҳозирча ишга келмаслик, ҳушёр бўлиш ва Исроилга алоқадор бўлган жойларга боришдан вақтинча тийилиш сўралган, — дейилади хабарда.
Таъкидланишича, Исроил элчихоналари мавжуд барча давлатлардаги эмас, балки бир қанча мамлакатлардаги дипломатик ваколатхоналарини ёпган. Улар қачон одатдагидай фаолият юритиши бўйича маълумот берилмаган.
Исроилнинг Эрон консуллигига ҳужуми
1 апрель куни Исроил ҳарбий-ҳаво кучлари Дамашқдаги Эрон консуллигига зарба берди. Эрон ташқи ишлар вазири Ҳусайн Амир Абдуллаҳиён мазкур ҳужум муносабати билан Америка жавобгарликка тортилиши кераклигини айтди.
Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлди. Шунингдек, уч нафар Сурия ва бир нафари Ливан фуқароси вафот этди. Эроннинг БМТ миссияси зарбани теракт деб баҳолади.
Ўзбекистон Исроил ҳужумини қоралади
Ўзбекистон Ташқи ишлар вазирлиги бир неча инсонларнинг қурбон бўлиши ва Эроннинг Дамашқ (Сурия) шаҳридаги дипломатик миссияси ҳудудида вайронагарчиликларга олиб келган Эрон консуллиги биносига уюштирилган ҳаво ҳужумини кескин қоралади.
Изоҳ (0)