Америкалик хонанда Бейонсенинг 29 март куни тақдим этган Cowboy carter номли альбоми Spotify қўшиқлар платформасида энг кўп эшитилган альбомга айланди. Бу ҳақда Europaplus нашри хабар берди.
Альбом эфирга узатилгандан сўнг бир кун ичида 76 миллион марта тингланган. Стриминг тизими ёзишича, мазкур кантри услубидаги қўшиқлар тўплами қисқа фурсатда катта муваффақиятга эришган илк альбом ҳисобланади.
Дарҳақиқат, Бейонсенинг ҳаётида кантри мусиқа жанри муҳим аҳамиятга эга, чунки хонанда Техасда туғилиб ўсган. Бироқ у қадимги америка мусиқа жанрига камдан кам мурожаат қилгани туфайли янги альбоми кўплаб муҳокамаларга сабаб бўлган эди.
Cowboy carter’ни яратишда Бейонсе узоқ йиллар давомида меҳнат қилди:
“Ушбу альбом устида беш йилдан ортиқ вақт давомида ишлаб келдик. Бундай тажриба менга бой тарихга эга кантри мусиқасини чуқурроқ ўрганиш имкониятини берди. Кантри услубидаги қўшиқлар бутун дунё бўйлаб миллионлаб одамларни бирлаштира олиши ва мен бунга ўз ҳиссамни қўшишим мени бахтли қилади”.
Cowboy carter 27 та қўшиқни ўз ичига олган. Ундан машҳур хонандалар — Майли Сайрус, реппер Фаррел Уильямс билан бирга куйланган дуэтлар ҳамда машҳур қўшиқларга каверлар ўрин олган.
Изоҳ (0)