Қозоғистонлик журналист Уалихон Косанбай ҳамюрти боксчи Данияр Элеусинов рингга қайтганини маълум қилди, деб хабар беради Sports.kz.
“Менга келган маълумотларга кўра, Дониёр Элеусинов навбатдаги жангини 27 апрель куни Олмаотада “IBA Champions Night” доирасида ўтказади. Дониёрнинг рақиби Ўзбекистон вакили Саиджамшид Жафаров бўлади. Жанг 71 килограммгача бўлган вазн тоифасида бўлиб ўтади ва ўн раундга мўлжалланган”, — деб ёзади Косанбай Facebookдаги саҳифасида.
Элеусинов Рио-2016 Олимпиадаси чемпиони бўлиб, ўшанда финал жангида ўзбекистонлик Шаҳрам Ғиёсовни ҳакамларнинг баҳсли қарори билан мағлубиятга учратган эди.
Эслатиб ўтамиз, Дониёр Элеусинов 2021 йилнинг декабрь ойида аргентиналик Хуан Эрнан Леални мағлуб этганидан буён жанг ўтказмаган.
Ўзбекистонлик Саижамшид Жафаров ҳаваскорлар тоифасида иштирок этади. У ўтган йили Тошкентда ўтказилган жаҳон чемпионатида кумуш медални қўлга киритган. Бундан ташқари боксчи икки карра Осиё чемпиони бўлган.
Изоҳ (0)