Samarqand viloyati Paxtachi tumanida Gentra avtomobili yo‘lning belgilanmagan joyidan o‘tayotgan piyodani urib yubordi. Bu haqda viloyat IIB YHXB axborot xizmati xabar berdi.
Ma’lum qilinishicha, hodisa 3-yanvar kuni soat 20:00 larda M-37 xalqaro avtomobil yo‘lining 137-kilometrida sodir bo‘lgan. Navoiy—Samarqand yo‘nalishida kelayotgan Gentra haydovchisi Paxtachi tumani “Hayit Elbegi” mahallasi hududida beton to‘siqdan oshib o‘tayotgan piyodani urib yuborgan.
YTH oqibatida og‘ir tan jarohatlari olgan piyoda hodisa joyida vafot etgan.
Qashqadaryo viloyati Mirishkor tumanida ham yuz bergan yo‘l-transport hodisasi oqibatida bir kishi vafot etgan.
Qayd etilishicha, tumanning “Yangihayot” mahallasi “Chandir” qishlog‘i hududidan o‘tgan yo‘lda harakatlanayotgan Nexia mashinasi yo‘lning qarama-qarshi tomonidan ketayotgan piyodani urib yuborgan. Og‘ir tan jarohatlari olgan piyoda ko‘rsatilgan tibbiy muolajalarga qaramasdan shifoxonada vafot etgan
Holat yuzasidan haydovchiga nisbatan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish oqibatida odam o‘limiga sabab bo‘lish) bilan jinoyat ishi qo‘zg‘atilgan.
Eslatib o‘tamiz, Surxondaryo viloyati Jarqo‘rg‘on tumanida noyabr oyida sodir bo‘lgan ikkita yo‘l-transport hodisasi oqibatida to‘rt kishi halok bo‘lgandi.
Izoh (0)