Тошкент шаҳри, Чилонзор туманида яшовчи 26 ёшли Х.С. ички ишлар органларига мурожаат қилиб, банк картасидан 550 минг сўм номаълум шахс томонидан фирибгарлик йўли билан ўзлаштирилганлигини маълум қилган. Бу ҳақда Киберхавфсизлик маркази матбуот хизмати хабар берди.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида мазкур жиноятни Тошкент вилояти Янгиҳаёт туманида яшовчи 15 ёшли А.Ф. содир этганлиги аниқланди.
Гумонланувчи сифатида тергов ҳаракатларига жалб этилган, А.Ф., жабрланувчи Х.С. билан Telegram орқали танишиб, PUBG аккаунтини сотиши ҳақида айтиб уни алдаб, ўзининг фойдаланувида бўлган банк картасига 550 минг сўм миқдоридаги пул маблағларини ўтказиб олган ва ёзишмаларни ўчириб юбориб, пулларини ўз эҳтиёжларига сарфлаб юборган.
Мазкур ҳолат юзасидан ЖКнинг 168-моддаси 3-қисми “г” банди (фирибгарлик ахборот тизимидан, шу жумладан ахборот технологияларидан фойдаланиб содир этилган бўлса) билан жиноят иши қўзғатилиб, А.Ф.нинг содир этилиб, фош этилмай қолган бошқа шу турдаги жиноятларга алоқадорлигини текшириш мақсадида тергов, тезкор-қидирув ҳаракатлари давом эттирилмоқда.
Изоҳ (0)