Марказий сайлов комиссияси раиси Элла Памфилова Россия президенти сайловининг расмий натижаларини эълон қилди. Унга кўра амалдаги президент Владимир Путин 87,28 фоиз овоз билан ғалаба қозонди.
Россиянинг амалдаги раҳбарига 76 277 708 киши овоз берган. Президентлик пойгасида иштирок этган бошқа номзодларнинг натижалари эса қуйидагича:
- Россия Коммунистик партиясидан депутат Николай Харитонов — 4,31 фоиз;
- “Янги одамлар”дан дума вице-спикери Владислав Даванков — 3,85 фоиз;
- Россия Либерал демократик партиясидан Леонид Слуцкий — 3,20 фоиз.
Сайловдаги давомат 77,49 фоизни ташкил этиб, рекорд ўрнатган. Овоз беришда 87 миллион 576 минг 75 нафар сайловчи иштирок этган. Хорижда президентлик сайловларида 388 минг 791 нафар сайловчи қатнашган. Россиядан ташқарида 295 та сайлов комиссиялари ташкил этилган.
Марказий сайлов комиссияси раисининг таъкидлашича, “дўст бўлмаган” мамлакатлардаги сайлов участкаларида кўпчилик Путинга овоз берган: Германияда – 56,82 фоиз, Эстонияда – 75,22 фоиз, Латвияда – 70,6 фоиз, Австралияда – 53,6 фоиз, Арманистонда – 54,7 фоиз, АҚШда – 42,23 фоиз.
Россия тарихида биринчи марта президентлик сайловлари уч кун давомида, 15-17 март кунлари бўлиб ўтди. Владимир Путин 7 май куни бешинчи президентлик муддатига киришади. Унинг ваколат муддати олти йил бўлади.
Изоҳ (0)