Олий Мажлис Сенати Кенгашининг навбатдаги мажлисида Сенатнинг қирқ олтинчи ялпи мажлисини 27 октябрь куни чақириш тўғрисида қарор қабул қилинди. Бу ҳақда парламент юқори палатаси матбуот хизмати хабар берди.
Ялпи мажлисда “Пробация тўғрисида”ги, “Йўл ҳаракати тўғрисида”ги, суд қарорларининг қонунийлиги, асослилиги ва адолатлилигини текшириш институти такомиллаштирилиши муносабати Фуқаролик процессуал, Иқтисодий процессуал, Маъмурий суд ишларини юритиш, Маъмурий жавобгарлик тўғрисидаги кодексларга ўзгартириш ва қўшимчалар киритиш ҳақидаги тўртта қонун кўриб чиқилади.
Шунингдек, “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги, “Ўзбекистон Республикасининг айрим қонун ҳужжатларига деҳқон хўжалигини юритиш учун ажратиладиган ер участкаларининг ўлчамини оширишга қаратилган ўзгартиришлар ва қўшимча киритиш тўғрисида”ги ва “Қўриқлаш фаолияти тўғрисида”ги қонуни қабул қилиниши муносабати билан айрим қонун ҳужжатларига ўзгартишлар киритиш ҳақидаги қонунларни ҳам муҳокама қилиниши режалаштирилган.
Бундан ташқари, ялпи мажлисда “Туркий инвестиция жамғармасини таъсис этиш тўғрисидаги битимни (Анқара, 2023 йил 16 март) ратификация қилиш ҳақида”ги қонун ҳамда Олий Мажлиснинг Бола ҳуқуқлари бўйича вакилини (Болалар омбудсманини) сайлаш тўғрисидаги масала ҳам кўриб чиқилиши кўзда тутилган.
Октябрь ўрталарида Ички ишлар вазирлиги “Йўл ҳаракати хавфсизлигини таъминлаш соҳасини янада ривожлантиришга доир қўшимча чора-тадбирлар тўғрисида”ги ҳукумат қарори лойиҳасини муҳокамага қўйганди. Ундан олдинроқ эса Вазирлар Маҳкамасининг “Йўл ҳаракати қоидаларига ўзгартириш ва қўшимчалар киритиш ҳақида”ги қарори лойиҳаси эълон қилинган эди. Ҳужжат билан “скутер” ва “индивидуал ҳаракатланиш воситалари” тушунчаларига таъриф берилиб, уларнинг қайси тоифадаги транспорт воситаси турига киришига аниқлик киритилмоқда.
Изоҳ (0)