ЎФА «Локомотив» футболчиларининг тотализатор ва келишилган ўйинларда иштироки ҳақидаги хабарлар бўйича баёнот берди

Ўзбекистон футбол ассоциацияси (ЎФА) тотализатор ва келишилган ўйинларда иштирок этган футболчилар ҳақида тарқалган хабарлар юзасидан баёнот берди.

Қайд этилишича, ЎФА махсус инспекцияси мазкур ҳолат бўйича текширувларни бошлаб юборган ва айни вақтда ўрганиш ишлари олиб бориляпти.

Вазиятни тўлиқ очиқлаш ва барча айбдорларни аниқлаш юзасидан халқаро ташкилотлар билан ҳам музокаралар олиб борилаётгани таъкидланган.

4 сентябрь куни турли ОАВда ўзини букмекерлик компанияси инспектори деб таништирган шахс «Локомотив» клуби футболчиларининг келишилган ўйинларда қатнашганини иддао қилгани ҳақида хабарлар янгради. Хусусан, ушбу хатга «Локомотив» легионери Кахи Махарадзенинг ёзишмалари илова қилинган.