Қашқадарёда уй ва машиналар учун фуқароларнинг 920 млн сўмдан зиёд пулини “ухлатган”лар ушланди

Қашқадарёнинг Кўкдала ва Китоб туманларида уй ва автомашина учун фуқароларнинг 921,2 миллион сўмини қўлга киритган МЧЖ раҳбарлари аниқланди. 

Хабарга кўра, ҳолатлардан бири Бош прокуратура ҳузуридаги департаментнинг Кўкдала туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда аниқланган. “К.И.” МЧЖ раҳбари Ж.Х. “Олтин дала” МФЙ ҳудудида қурилаётган кўп қаватли уй хонадонларини сотишда 4 нафар фуқародан дастлабки тўлов сифатида тўланган маблағлар эвазига уларга хонадонларини расмийлаштириб бермасдан жами 457,2 миллион сўмини фирибгарлик йўли билан қўлга киритган.

Шу каби департаментнинг Китоб туман бўлими томонидан ўтказилган терговга қадар текширувда “К.С.” МЧЖ раҳбари М.А. фуқароларга ўзи раҳбарлик қилаётган МЧЖ томонидан шартнома асосида мижозларга осон ва қисқа муддатларда автомашиналарни етказиб бераётганини айтиб, 3 нафар фуқарога 2 ой муддатда Tracker, Cobalt ва Damas олиб бериши эвазига уларнинг жами 464 миллион сўмини фирибгарлик йўли билан қўлга киритгани аниқланган. 

Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.