Қашқадарё вилояти, Китоб туманида яшовчи 23 ёшли М.Э. ички ишлар органига мурожаат қилиб, банк картасидан 975 доллар миқдоридаги пул маблағлари номаълум шахс томонидан фирибгарлик йўли билан ўзлаштирилганлигини маълум қилган. Бу ҳақда Киберхавфсизлик матбуот хизмати хабар берди.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, ушбу жиноятни Тошкент шаҳар, Чилонзор туманида яшовчи 21 ёшли И.А. содир этганлиги аниқланган.
Гумонланувчи сифатида тергов органларига жалб этилган И.А. Telegram орқали М.Э. билан танишиб, унга АҚШдан ҳисоб рақам олиб беришини ваъда қилиб, алдов йўли билан ундан 975 доллар миқдоридаги пулларни ўзининг фойдаланувида бўлган пластик картасига ўтказиб олган. Сўнгра у билан алоқани узиб, пулларни ўз эҳтиёжлари учун сарфлаб юборган.
Мазкур ҳолат юзасидан ЖКнинг 168-моддаси 1-қисми (фирибгарлик, яъни алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш) билан жиноят иши қўзғатилиб, И.А.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.
Изоҳ (0)