Фарғонада “Ташаббусли бюджет”га овоз йиғаётган фуқарони ички ишлар ходимлари олиб кетгани ҳақида хабарлар тарқалди. Вилоят ИИБ ҳолатга изоҳ берди.
Маълум бўлишича, 18 март куни фуқаро Ш.Қ. танишлари билан Ўзбекистон тумани Яйпан бозори олдида, йўлнинг қатнов қисмида автомашиналарга халақит бериб, одамларни атрофига тўплаб, “Ташаббусли бюджет”га овоз йиғаётган пайт шу ердаги фуқаронинг телефони ерга тушиб кетгани учун ўзаро келишмовчилик келиб чиққан.
Шу сабабли ИИО ходимлари у ерга етиб борган. Ходимлар келишмовчиликни бартараф қилиб, фуқаро Ш.Қ.га йўл четида туриб, фаолиятини давом эттириши тушунтирилганда, у ходимларнинг қонуний талабига бўйсунмасдан, фаол қаршилик кўрсатган.
Мазкур ҳолат юзасидан фуқаро Ш.Қ.га нисбатан Маъмурий жавобгарлик тўғрисидаги кодекснинг 194-моддасига асосан ҳужжатлар расмийлаштирилиб, суд органига тақдим қилинди. Суд фуқаро Ш.Қ.га нисбатан баъзавий ҳисоблашнинг тўрт баравари миқдорида жарима жазоси тайинлади.
Изоҳ (0)