Самарқандда 13 яшар бола Damas’да оёғи занжир билан кишанланган ҳолда топилганди. Ҳолат юзасидан жиноят иши қўзғатилди.
ИИБ ахборот хизмати раҳбари Жаҳонгир Сагдуллаев берган маълумотга кўра, бу ҳақда хабар вилоят ИИБ 102 операторига 16 март куни хабар келиб тушган ва ҳудудга ИИБ ходимлари бориб, ҳолатни расмийлаштирган. Болани “Вояга етмаганларга ижтимоий-ҳуқуқий ёрдам кўрсатиш маркази”га жойлаштириб, психолог ёрдамида зарурий кўмаклар бериш чоралари кўрилган.
“Эзгулик” жамияти фаоли Абдураҳмон Ташановнинг ёзишича, болани банди ҳолатда кўрган атрофдагилар 102 га қўнғироқ қилган. ИИО ходимлари зўравон шахснинг собиқ ходим эканини билгач, атрофдагиларга бу ҳолатнинг зўравонлик бўлмагани ҳақидаги далолатномага қўл қўйдирган.
Бош прокуратура матбуот хизмати раҳбари Ҳаёт Шамсутдинов болага нисбатан зўравонлик қилинганлиги ҳолати юзасидан Жиноят кодексининг 138-моддаси (зўрлик ишлатиб ғайриқонуний равишда озодликдан маҳрум қилиш) билан жиноят иши қўзғатилганини маълум қилди.
Ҳозирда ички ишлар органлари томонидан тергов ҳаракатлари олиб борилмоқда. Тергов жараёни назоратга олинган.
Изоҳ (0)