Бокуда “Лазги. Муҳаббат ва қалб рақси” балет спектакли намойиш этилди. Бу ҳақда президент ёрдамчиси Саида Мирзиёева маълум қилди.
Унинг билдиришича, Озарбайжон пойтахтида “Чоклардаги мерос: Ўзбекистоннинг каштачилик ва тикувчилик анъаналари бўйлаб саёҳат” кўргазмаси очилди. Ўзбекистоннинг маданий мероси билан танишув “Лазги — Муҳаббат ва қалб рақси” спектаклидан бошланди.
“Санъат инсонларни янада яқинлаштириш, уларни ҳамфикр қилиш ҳамда гўзалликнинг янги қирраларини кашф этиш қудратига эга ва бу мени доим ҳайратга солади. Лазги рақси инсонларни бирлаштирувчи, илҳом бағишловчи, вақт ва макон чегараларини тан олмайдиган ана шундай кучга яққол мисолдир”, — дейди Саида Мирзиёева.
Маълумот учун, 2021 йилда Саида Мирзиёева бошчилигидаги Маданият ва санъатни ривожлантириш жамғармаси томонидан Жаҳон мероси рўйхатига киритилган лазги рақси балет кўринишида саҳналаштирилганди. 2022 йил 28–29 июнь кунлари “Лазги” балети Бурса шаҳридаги Меринос Отатурк саҳнасида намойиш этилган.
2023 йил сентябрида Россия Катта театрида ушбу балет премьераси бўлиб ўтган. 2024 йилнинг январида Пекиндаги Хитой миллий опера театри саҳнасида “Лазги. Муҳаббат ва қалб рақси” балет спектакли намойиш этилди. Уч йиллик гастрол сафарлари давомида “Лазги. Муҳаббат ва қалб рақси” спектакли Дубай, Истанбул, Бурса, Дортмунд, Москва, Париж ва Санкт-Петербургда томошабинлар олқишига сазовор бўлган.
“Лазги” Хоразм рақси Ўзбекистон маданий меросининг элементи сифатида Инсониятнинг номоддий маданий мероси репрезентатив рўйхатига киритилган. Бу ҳақдаги қарор 2019 йил 12 декабрь куни ЮНЕСКОнинг Номоддий маданий меросни муҳофаза қилиш бўйича ҳукуматлараро қўмитасининг 14-сессиясида қабул қилинган.
Изоҳ (0)