WBO рейтинги янгиланди. Шаҳрам Ғиёсов ва Муроджон Аҳмадалиев кўтарилди

Бутунжаҳон бокс ташкилоти (WBO) март ойи учун янгиланган рейтингни эълон қилди.

Унга кўра, ўтган ойда 7-поғонада бўлган Муроджон Аҳмадалиев 6-ўринга кўтарилиб олди. Элиминатор жангида ғалаба қозонган Шаҳрам Ғиёсов эса ярим ўрта вазн тоифаси WBO рейтингида 2-ўринга юқорилади. У ўтган ойда рейтингнинг 3-поғонасидан жой олганди. Айни пайтда ушбу вазн чемпиони америкалик Теренс Кроуфорд бўлиб турибди. Рейтингнинг биринчи поғонасида НАБО камари соҳиби, америкалик Жиовани Сантилян бормоқда.    

Қолган боксчилар рейтингдаги ўз ўрнини сақлаб қолган. 

Рейтингдан 6 нафар ўзбекистонлик боксчи жой олган:

Ҳасанбой Дўсматов (биринчи ўта енгил вазн (48,8 кг): 6-ўринда қолди;

Олимжон Назаров (ўта енгил вазн тоифаси - 50,8 кг): ўтган ойдаги каби 5-ўринда қолди;

Муроджон Аҳмадалиев (биринчи ярим енгил вазн тоифаси - 55,3 кг): 7-поғонадан 6-ўринга кўтарилди;

Шаҳрам Ғиёсов (ярим ўрта вазн тоифаси - 66,6 кг): бир поғона юқорилаб, 2-ўринга жойлашди;

Бектемир Мелиқўзиев (супер ўрта вазн - 76,2 кг) ўтган ойдагидек 7-поғонада;

Баҳодир Жалолов (супер оғир вазн - 90,7 кг) ўтган ойдаги сингари 15-ўринда қолди.