Тимур Раҳмонов Ўзбекистоннинг Латвиядаги элчиси этиб тайинланди. Бу ҳақда “Дунё” АА хабар берди.
Маълум қилинишича, янги тайинланган элчи 2021—2024 йилларда Ўзбекистоннинг Новосибирск шаҳридаги бош консули лавозимида ишлаган. Унинг консуллик округига Россиянинг Сибир федерал округи кирган.
46 ёшли Тимур Раҳмонов Жаҳон иқтисодиёти ва дипломатия университетини тамомлаган. ТИВ тизимидаги фаолиятини 1999 йилда бошлаган. Ўтган йиллар давомида у вазирлик марказий аппаратида, шунингдек, Ўзбекистоннинг Польша, Италия ва Испаниядаги элчихоналарида турли лавозимларда ишлаган.
2017–2018 йилларда эса Ташқи ишлар вазирлигининг Урганч шаҳри ҳудудий бошқармаси бошлиғи, Хоразм вилояти ҳокимининг инвестициялар, инновациялар, хусусийлаштирилган корхоналарга кўмаклашиш, эркин иқтисодий ва кичик саноат зоналарини ривожлантириш масалалари бўйича ўринбосари сифатида фаолият олиб борган.
Тимур Раҳмонов Ўзбекистоннинг Латвиядаги дипломатик миссияси раҳбари (2019–2024) ҳамда Ўзбекистоннинг Литва (2021–2024), Эстония (2020–2024) ва Финляндиядаги (2020–2024) ўриндошлик асосидаги элчиси сифатида ишлаган Қадамбой Султонов ўрнига тайинланди.
Изоҳ (0)