Toshkent shahar IIBB Yo‘l harakati xavfsizligi boshqarmasining Ro‘yxatga olish — Diagnostika markazi ish boshladi. IIV Yo‘l harakati xavfsizligi xizmati tomonidan markazga jurnalistlar uchun press tur uyushtirdi.
Ta’kidlanishicha, markaz faoliyatini tashkil etishda Germaniya, Belgiya, Fransiya kabi rivojlangan davlatlar shaharlarining ekologik muhitini muhofaza qilish sohasidagi ilg‘or tajriba inobatga olingan.
Bu yerda transport vositalariga davlat raqam belgisi biriktirish va qayd etish guvohnomasini topshirish jarayoni turli byurokratik to‘siqlar va ovoragarchilikdan xoli qilingan, inson omili minimal darajaga tushirilgan. Avval avtomototransport vositasini ro‘yxatdan o‘tkazish jarayoni olti-yetti bosqichda amalga oshirilgan bo‘lsa, hozirda bosqichlar soni uchtaga qisqargan.
I-bosqich
Transport vositalarining qarzdorligi va taqiqini avtomatik tekshirish va bartaraf etish. (A blok) Davlat xizmatlaridan foydalanish uchun kelgan transport vositalari obyektga kirish qismida tashkil etilgan yo‘laklar bo‘ylab harakatlanadi.
Bunda yuk avtomobillari hamda davlat xizmatlaridan foydalanish uchun onlayn ro‘yxatdan o‘tgan transport vositalari alohida yo‘laklarga yo‘naltiriladi.
Har bir yo‘lakka o‘rnatilgan statsionar kamera yordamida avtomobilning davlat raqam belgisi qayd etiladi va Yo‘l harakati xavfsizligining “Yagona avtomatlashtirilgan axborot tizim”dan tekshiruvdan o‘tkaziladi.
- Qarzdorligi yoki taqiq mavjud transport vositalari alohida yo‘lak orqali ma’muriy binoga yo‘naltiriladi.
- Qarzdorligi yoki taqiq mavjud bo‘lmagan transport vositalariga elektron navbat biriktirilib keyingi bosqichdan o‘tish uchun “B blok”ka yo‘naltiriladi.
Bunda transport vositalarining harakatlanishi yo‘l yotiq chiziqlari, ajratuvchi to‘siq va avtomatik shlagbaumlar yordamida tartibga solinadi. Ma’lumot uchun, birinchi bosqichda inson omili ishtirok etmaydi.
II-bosqich
Transport vositasini texnik va ekologik ko‘rikdan o‘tkazish (B blok). DYHXX xodimi tomonidan transport vositasining agregat va kuzov raqamlari hujjatlarga mosligi tekshirilib, elektron planshet orqali ro‘yxatga olinadi va davlat raqam belgisi elektron tartibda biriktiriladi.
Diagnostika markazining texnik mutaxassisi tomonidan transport vositasidan ekologiyaga chiqayotgan zararli moddalar miqdori tekshiriladi. Transport vositasini texnik va ekologik ko‘rikdan o‘tkazish yakunida elektron tizim orqali kvitantsiya shakllantiriladi va haydovchining telefoniga SMS shaklida xabarnoma yuboriladi.
Haydovchi to‘lovlarni mobil ilova, elektron to‘lov tizimlari yoki bevosita yo‘laklarda o‘rnatilgan to‘lov terminallari orqali amalga oshiradi. Transport vositasi keyingi bosqichga o‘tish uchun maxsus tashkil etilgan va elektron monitor hamda radioto‘lqin tarqatadigan kutish maydoniga yo‘naltiriladi.
III-bosqich
Transport vositasiga davlat raqam belgisini biriktirish va tayyor bo‘lgan qayd etish guvohnomasini taqdim etish. (C blok) Elektron monitor hamda radioto‘lqin orqali navbati kelgani haqida ma’lumot olgan transport vositasi tayyor hujjatlarni taqdim etish yo‘lagiga harakatlanadi.
Mazkur yo‘lakda texnik xodim tomonidan transport vositasiga davlat raqam belgisi biriktiriladi va qayd etish guvohnomasi topshiriladi. Shu bilan birga, ekologik tekshiruv natijasidan kelib chiqib “qizil”, “sariq” yoki “yashil” yorliq (stiker) transport vositasining old oynasiga yopishtiriladi.
Ma’lumot uchun, ro‘yxatdan o‘tkazish va ekologik diagnostika markazida fuqarolarga qo‘shimcha qulaylik yaratish va bosqichlardan o‘tishda ko‘maklashish maqsadida har bir bosqich o‘tkaziladigan hududlarga yo‘naltiruvchi xodimlar biriktiriladi.
Ma’lum qilinishicha, avvallari DYHHX organlarida avtomototransport vositasini ro‘yxatdan o‘tkazish jarayoni 6-7 bosqichda amalga oshirilgan bo‘lsa, hozirda mazkur bosqichlar soni uchtaga qisqaradi. Natijada sarflanadigan vaqt avvalgi 2 soatdan 15-20 daqiqagacha qisqaradi.
Hozirgi kunda 3 bosqichli yangi tizim Toshkent shahridagi “Yunusobod”, “Chilonzor” va “Uzbum-Mirobod” ro‘yxatlash bo‘linmalarida sinovdan o‘tkazilmoqda.
Izoh (0)