Венесуэла ҳукумати АҚШни Аргентина расмийлари иштирокида Aerocargos del Sur (Emtrasur) авиакомпаниясига тегишли Boeing 747-300 самолётини ўғирлаганликда айблади. Бу ҳақда Венесуэла ташқи ишлар вазири Иван Гил Пинтон ўзининг Х ижтимоий тармоғида хабар берди.
Маълум қилинишича, Венесуэла авиалайнерни қайтариш учун барча чораларни кўради.
“Венесуэла Боливар республикаси 12 февраль куни АҚШ ва Аргентина ҳукуматлари тил бириктириш натижасида Emtrasur транспорт компаниясига тегишли бўлган YV3531 давлат рақамига эга Boeing 747-300 самолёти ўғирланганига қатъиян қаршилик қилади”, — дейди Иван Гил Пинтон.
Баёнотда ушбу компаниянинг ҳуқуқлари ва фуқаролик аэронавтикаси нормалари қўпол равишда бузилгани кўрсатилган ва бу ҳаво қатнови хавфсизлигига таҳдид солаётгани айтилган. Шунингдек, вазирлик Венесуэла бу ҳаракатга мутаносиб жавоб бериши ва бунинг учун “миллий конституция, дипломатия ва халқаро ҳуқуқ доирасида барча мавжуд воситалардан” фойдаланиши таъкидланади.
Изоҳ (0)