“Ақлли” соат тунда ечиб қўйилмаса нима бўлади? Шифокор огоҳлантиради

Шифокор Наталья Белованинг сўзларига кўра, “ақлли” соатларни тунда ҳам тақиш тавсия этилмайди. Бу ҳақда “Новый очаг” нашри хабар бермоқда.

Шифокор-терапевтнинг таъкидлашича, кунига 24 соат давомида билакка бирор нарса тақиш зарарли, чунки зич боғланган соат ва турли браслетлар томир ва нервларга босим ўтказади. Бу жуда нохуш оқибатларга олиб келиши мумкин.

Шунингдек, доимий соат тақиш терининг шикастланишига, унинг остида чанг, сув, бактерияларнинг йиғилиб қолишига олиб келади. Буларнинг барчаси тери инфекциялари кўпайиши учун қулай муҳитдир.

Шу сабабли шифокорлар кечаси нафақат “ақлли” соатларни, балки заргарлик буюмларини ҳам ечиб ухлашни тавсия этади. Чунки тунда ақлли соатлар ёрдамида юрак уриши, қадамлар каби физиологик кўрсаткичларни ўлчашдан наф йўқ.

Аввалроқ Буюк Британиянинг Кардифф университети олимлари “ақлли” соатлар Паркинсон касаллигини жуда эрта босқичларда — илк аломатлар пайдо бўлишидан етти йил аввал аниқлаш имконини беришини исботлади.