“Мўътабар аёл зотига таъзим қиламиз”. Шавкат Мирзиёев 8 март муносабати билан Ўзбекистон хотин-қизларини табриклади

Тошкентда Халқаро хотин-қизлар кунига бағишланган тантанали маросим бўлиб ўтди. Маросимда Шавкат Мирзиёев иштирок этиб, аёлларга самимий меҳри ва ҳурматини изҳор этди, деб хабар бермоқда Президент матбуот хизмати.

“Биз ҳар йили бу кунни интиқлик, қалбимизда ажиб илиқлик билан кутамиз. Ушбу шукуҳли айёмда ҳаммамиз бизни дунёга келтирган, оқ сут бериб, меҳр ва тарбия бериб вояга етказган буюк она сиймосига, мўътабар аёл зотига таъзим қиламиз. Зеро, инсон қадрини улуғлаш аввало азиз-у мукаррама аёлларимизни улуғлашдан бошланади, — деди давлат раҳбари.

Президент Ўзбекистонда бу мақсад йўлида кўп ишлар қилинаётганини айтди. Жумладан, “Ўзбекистон–2030” стратегияси доирасида хотин-қизларнинг фаоллигини ошириш, оналик ва болаликни ҳимоя қилиш, гендер тенгликни қарор топтириш, аёлларнинг ҳуқуқ ва манфаатларини таъминлаш бўйича чора-тадбирлар амалга оширилмоқда.

Хотин-қизларнинг иқтисодий имкониятларини кенгайтириш, улар ўртасида тадбиркорликни ривожлантириш бўйича ҳам салмоқли натижаларга эришилмоқда. Сўнгги 5 йил ичида Ўзбекистонда ишбилармон аёллар сафи икки баравар кенгайиб, ўз бизнесини йўлга қўйган тадбиркор хотин-қизлар сони 205 мингдан ошди. Шунингдек, 200 мингга яқин аёллар касб-ҳунар ва тадбиркорликка ўқитилди. 400 мингдан кўпи иш билан таъминланди.

Ҳозирги кунда олийгоҳларда таълим олаётган 1 миллион 300 минг нафарга яқин талабанинг ярмидан кўпини қизлар ташкил этмоқда. Эҳтиёжманд оилаларга мансуб хотин-қизлар қўшимча давлат гранти бўйича ўқишга қабул қилинмоқда. Улар учун имтиёзли таълим кредитлари ажратиш, ижтимоий ҳимояга муҳтожларнинг контракт пулини қоплаб бериш йўлга қўйилган.

“Қанчалик қийин бўлмасин, биз қўшимча имконият топиб, ижтимоий соҳаларни ривожлантириш, хотин-қизларимизнинг ўз салоҳиятини рўёбга чиқаришлари учун шароит яратмоқдамиз ва бу ишларимиз албатта давом этади. Чунки аёлларнинг, хусусан, қиз боланинг ўқиб, олий маълумотли бўлиши, касб-ҳунар эгаллаши оила бахти, фарзандлар камоли учун, шу асосда бутун жамият равнақи учун хизмат қилади”, – деди Шавкат Мирзиёев.

Президент аёл зоти учун энг улуғи оналик бахти эканини таъкидлади. Ўзбекистон аҳолиси ҳар йили қарийб 900 мингга кўпаяётганини, уларни жисмоний ва маънавий баркамол этиб, ватанпарварлик руҳида тарбиялаш муқаддас бурч эканини қайд этди. Шу маънода, давлати раҳбари барча аёлларга мурожаат қилди.

“Биз маънавий тарбия ишларини энди мутлақо янгича усулда олиб боришимиз керак. ъЭзгулик – шиоримиз, маърифат – қуролимизъ деган ғоя асосида бу жараённи аввало оиладан, маҳалладан бошлашимиз лозим. Зотан, ҳадиси шарифда айтилганидек, ъОта-она ўз фарзандига яхши тарбиядан бошқа мерос қолдиролмайдиъ. Муҳтарама опа-сингилларимиз, дуогўй онахонларимизнинг масъулияти – айнан ана шу масалаларда яққол намоён бўлади” — деди Шавкат Мирзиёев.

Президент байрам тадбирида қатнашаётган хорижий давлатларнинг элчилари ва халқаро ташкилотлар вакилаларини ҳам табриклади.

Президентнинг 4 мартдаги қарорига биноан 28 нафар қиз “Зулфия” номидаги давлат мукофоти билан, 5 мартдаги фармонга мувофиқ турли соҳаларда фаол бўлган аёллар орден ва медаллар билан тақдирланган эди. Тадбирда ана шу мукофотлар тантанали равишда топширилди.

Тантанали маросимдан лавҳалар