Дубайлик ҳинд тадбиркори Pure Gold Jewellery асосчиси Фироз Мерчант рамазон ойи олдидан маҳбусни озод қилиш учун 1,5 миллион дирҳам (408 минг доллардан зиёд) хайрия қилади. Бу ҳақда Khaleej Times хабар берди.
Маълум қилинишича, 900 нафар маҳбус молиявий қарзлари сабабли қамоқ жазосини ўтамоқда.
“Кўп одамлар таълим ёки соғлиқни сақлашга сахийларча хайрия қилади, аммо панжара ортидагилар ҳақида кам ўйлашади. Бу одамлар қаттиқ тартибдаги жиноятчилар эмас, балки бахтсизлик қурбони бўлиб, ўзларига боғлиқ бўлмаган ҳолатлар туфайли молиявий мажбуриятларини бажара олмайди. Улар янгидан бошлашга лойиқдир. Менинг ташаббусим айнан шу мақсадга қаратилган”, — деди Мерчант.
Маълум бўлишича, сўнгги 16 йил ичида у 20 минг маҳбусни озод қилишга ёрдам берган. 66 ёшли заргар ўзининг 2008 йилда ташкил этилган “Унутилган жамият” ташаббуси орқали маҳбусларнинг нафақат қарзларини тўлаш, балки уйларига қайтиб, оилалари билан бирлашишлари учун уларга авиачипталар тақдим этишни мақсад қилган.
Мерчантнинг ўзи камбағал оилада туғилиб, оғир шароитларда ўсган. Аммо кўп йиллик меҳнатидан сўнг 1989 йилда Pure Gold Jewellery компаниясига асос солган, бугунги кунда унинг 12 мамлакатда 150 дан ортиқ дўконлари бор.
Изоҳ (0)