Сурхондарё вилоятида экологик талабларга жавоб бермайдиган 2 та корхона фаолияти ўн кун муддатга тўхтатилди. Бу ҳақда Экология вазирлиги ахборот хизмати хабар берди.
Унга кўра, Сурхондарё вилояти Экология бошқармаси томонидан асфалт ишлаб чиқарадиган “Бойсун туман йўллардан фойдаланиш корхонаси” ҳамда “Шеробод туман йўллардан фойдаланиш корхонаси”да экологик текширувлар ўтказилди. Текширув давомида корхоналарда Бойсундаги корхонада чанг-газ тозалаш ускуналари фойдаланишга яроқсиз ҳолга келиб қолгани, заводдан чиқадиган чанг-газларни ушлаб қолувчи филтрлар ва сув пуркаш орқали чангларни ушлаб қоладиган ускуналар ўрнатилмагани аниқланди.
Шеробод корхонасида эса чанг-газ тозалаш ускунаси эскиргани сабабли атмосферага зарарли ташламаларнинг меъёридан ортиқ чиқарилаётгани маълум бўлди.
“Бойсун туман йўллардан фойдаланиш корхонаси” ҳамда "Шеробод туман йўллардан фойдаланиш корхонаси”га нисбатан, “Атмосфера ҳавосини муҳофаза қилиш тўғрисида”ги қонуннинг 4-24-моддалари талаби бузилганлиги, қатор камчиликлар аниқланганлиги сабабли МЖтКнинг 86-моддаси 1-қисмига асосан маъмурий баённома расмийлаштирилди. Корхоналар фаолияти 10 кун муддатга — мавжуд муаммолар ҳал этилиб, филтрлаш асбоб-ускуналари ўрнатилгунига қадар тўхтатилди.
Маълумот учун, жорий йилнинг 29 январь куни давлат раҳбари раислигида видеоселектор йиғилиши ўтказилган, унда жорий йил якунига қадар йирик саноат корхонасида замонавий чанг-газ тозалаш ускуналари ўрнатиш ва эскиларини алмаштириш, ҳавога чанг ташлаш даражаси юқори бўлган корхоналарда филтрларни янгилаш вазифаси қўйилган.
Изоҳ (0)