Ўзбекистонда Жанубий Корея билан биргаликда қурилиш материаллари соҳасида замонавий лаборатория барпо этилиши маълум қилинди.
Хабар берилишича, “Ўзсаноатқурилишматериаллари” уюшмаси, “Ўзсаноатқурилишбанк” ва соҳага алоқадор бошқа ташкилотлар вакилларидан иборат делегация амалий сафар билан Жанубий Кореяда бўлиб турибди. Корея мувофиқланган лабораториялари (КМЛ) ташкилотида бўлиб ўтган мулоқот чоғида делегация вакиллари қурилиш материаллари сифати ҳамда синов лабораторияси фаолияти билан яқиндан танишди.
Музокаралар якунида “Ўзсаноатқурилишматериаллари” уюшмаси ва Жанубий Корея мувофиқланган лабораториялари ўртасида синов лабораториясини ташкил этиш бўйича ҳамкорлик меморандуми имзоланди. Замонавий лаборатория барпо этилгач, 30 дан ошиқ қурилиш материалларининг 300 га яқин сифат кўрсаткичлари халқаро стандартларда синовдан ўтказилиши йўлга қўйилади.
КМЛ Жанубий Кореядаги қурилиш материаллари ва бошқа соҳаларда синов ҳамда сертификатлаш хизматларини таклиф этувчи нуфузли ташкилот саналади. Унинг ушбу давлатда 20 га яқин синов лабораторияси, дунёнинг 6 та мамлакатда ваколатхонаси, шунингдек, 30 мингга яқин мижозлари ва мингга яқин юқори малакали мутахассислари мавжуд.
Жанубий кореялик ҳамкорлар билан учрашув давомида уларга мамлакатда қурилиш материаллари ишлаб чиқариш соҳасида халқаро алоқаларни янада ривожлантириш, хорижий давлатларда ишлаб чиқарилган замонавий технологиялар, жумладан, илғор лаборатория мажмуаларини олиб келиб, каолин хом ашёси ҳамда бошқа асосий турдаги маҳсулотларни лаборатория синовларидан ўтказиш имкониятини яратишга қаратилган ишлар амалга оширилаётгани ҳақида маълумот берилган.
Изоҳ (0)