Ўзбекистоннинг уч ҳудудида акциз маркасиз тамаки маҳсулотлари савдоси билан шуғулланиб келган шахслар ушланди.
Маълум қилинишича, Бош прокуратура ҳузуридаги департаментнинг Учтепа туман бўлими, ДХХ ва божхона ходимлари ҳамкорлигида ўтказилган тезкор тадбирда хорижда ишлаб чиқарилган тамаки маҳсулотлари савдоси билан шуғулланиб келган И.М. ва бошқалар хонадонда умумий баҳоси 391,9 миллион сўмлик 9 турдаги жами 20 890 қути акциз маркасиз тамаки маҳсулотини сотиш учун сақлаб қўйгани аниқланиб, ушбу маҳсулотлар ашёвий далил сифатида олинган.
Шу каби, департаментнинг Наманган туман бўлими томонидан ўтказилган тезкор тадбирда тамаки маҳсулотлари савдоси билан шуғулланиб келган Я.М. ва Т.С. (муқаддам судланган) жами 6 500 қути “Милано Лондон” номли акциз маркасиз тамаки маҳсулотини фуқаро М.Х.га 4 420 АҚШ долларига сотишга келишиб, шундан 16 миллион сўмни олган вақтида ашёвий далиллар билан ушланган.
Департаментнинг Навоий вилояти бошқармаси томонидан божхона ходимлари билан ҳамкорликда ўтказилган тезкор тадбирда эса тамаки маҳсулотлари савдоси билан шуғулланиб келган О.Б. ўзининг Nexia-2 автомобилида ҳеч қандай ҳужжатсиз уч турдаги жами 1 350 қути акциз маркасиз тамаки маҳсулотини ўтказиш мақсадида Навоий шаҳрига олиб келаётган вақтида ашёвий далил сифатида олинган.
Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)