Ижтимоий ҳимоя миллий агентлиги 2023 йилнинг ноябрь ойида Чиноз туманида жойлашган Республика қизлар ўқув-тарбия муассасасида комплекс ўрганиш ишлари олиб борилаётганини маълум қилган эди.
Ўшанда, бир неча ҳолатлардан келиб чиққан ҳолда (айнан қандай ҳолатлар ўрганишга сабаб бўлгани айтилмаган — таҳририят), муассасага қизларни қабул қилиш жараёни вақтинча тўхтатиб турилиши айтилганди.
Муассасада 30 октябрдан ўрганиш ишлари бошлаб юборилди. Комплекс ўрганишлар натижаси хулосаси бўйича яқин вақт ичида (орадан 4 ой вақт ўтди — таҳририят) маълумот тақдим этилади.
Ушбу ўрганишлар Ижтимоий ҳимоя миллий агентлиги директори биринчи ўринбосарининг бевосита назорати остида ўтказилмоқда, — дея изоҳ берган эди агентлик ахборот хизмати.
Ўрганиш ишлари бошланганига 4 ойдан ортиқ вақт ўтган бўлса-да, ҳалигача бирор изоҳ берилгани йўқ. Муассасадаги қизларнинг келгуси тақдири нима бўлгани, ўрганишга айнан қандай омиллар сабаб бўлгани ва бунга жавобгар бўлган шахсларга қандай чора кўрилгани мавҳумлигича қолмоқда. У ердаги ишчиларнинг меҳнат ҳуқуқлари қай даражада таъминлангани юзасидан ҳам саволлар очиқ.
“Дарё” нашрига келиб тушган маълумотга кўра, муассаса ёпилган ва қизлар ўзга оилаларга қайтарилган ёки бошқа оилаларга бириктириб берилган.
Мазкур масала юзасидан “Дарё” мухбири Ижтимоий ҳимоя миллий агентлиги ахборот хизматига бир неча маротаба сўров билан чиқди, лекин ҳали жавоб олганича йўқ.
Ўйлаймизки, масъул идоралар мазкур масала юзасидан тез орада жамоатчиликка аниқ маълумот тақдим этади.
“Дарё” нашри воқеалар ривожини кузатиб боради.
Маълумот учун, президент Шавкат Мирзиёевнинг 2023 йил 1 июндаги фармонига асосан Ижтимоий ҳимоя миллий агентлиги ташкил этилган.
Агентлик аҳолини ижтимоий ҳимоя қилиш ва ижтимоий хизматлар кўрсатиш соҳасидаги ягона давлат сиёсатини ишлаб чиқиш ва амалга ошириш бўйича ваколатли давлат органи ҳисобланади.
Изоҳ (0)