Қатар Ташқи ишлар вазирлиги воситачилигида Афғонистондаги Австрия фуқароси қамоқдан озод қилинди. Бу ҳақда Etilaatroz хабар берди.
Озод қилинган фуқаронинг шахси ҳақида ҳеч нарса очиқланмаган ва у ҳозирда Доҳада экани айтилмоқда. Қатар ташқи ишлар вазири ўринбосари Муҳаммад бин Абдулазиз бин Солиҳ Ал-Халифий “Толибон”га Австрия фуқаросини озод қилишда ҳамкорлик қилгани учун миннатдорлик билдирган.
Австрия Ташқи ишлар вазирлиги 2023 йил июнь ойида фуқароси Афғонистонга сафар қилганидан сўнг “Толибон” томонидан ҳибсга олинганини маълум қилган. Ўшанда Австрия оммавий ахборот воситалари фуқаро 80 ёшда бўлиб, экстремал ўнг партия асосчиларидан бири эканини ёзган. Унинг фаолияти 1988 йилда тақиқланган.
Қамоққа олинган шахс “Герберт Ф” деб аталган ва у хавфли жойларга саёҳат қилишга қизиққан. У “Толибон” томонидан ҳибсга олинишидан олдин “Толибон билан байрам” сарлавҳали мақола ёзиб, унда Афғонистондаги ҳаётга ижобий муносабат билдирган.
Изоҳ (0)