Бугун, 26 февраль куни президент Маҳмуд Аббос бошчилигидаги Фаластин маъмурияти истеъфога чиқиши тўғрисида хабарлар тарқалди. Бир оз вақт ўтиб эса Фаластин бош вазири Муҳаммад Штае истеъфога чиқишга ариза берди.
Ушбу ўзгаришлар Ғазодаги урушни тўхтатиш, Исроил ҳарбийларининг у ердан чиқиб кетиши учун халқаро кафолат бериш, Ғарбий Соҳилга бостириб киришни тўхтатиш ва Фаластиндан молиявий блокадани олиб ташлашга олиб келиши кутилмоқда.
“Дарё” Яқин Шарқ масалалари бўйича мутахассис Фарҳод Каримовнинг Фаластин ҳукуматидаги ўзгаришлар ва Яқин Шарқдаги юз бераётган воқеалар ривожи ҳақидаги фикрлари билан қизиқди.
Сиёсатшуноснинг таъкидлашича, Яқин Шарқ минтақасидаги мамлакатлар урушни тўхтатиш ва Фаластин давлатини ташкил этиш борасида Исроил ва АҚШ билан келишувга эришган.
“Охирги вақтларда Яқин Шарқ минтақасидаги давлатлар, хусусан, Саудия Арабистони, Қатар ва Миср Исроил ҳамда АҚШ билан Ғазо секторидаги уруш ҳаракатларини тўхтатиш ва Фаластин давлатини ташкил этиш борасида келишишга ҳаракат қилди. Мисол учун, АҚШ давлат котиби Энтони Блинкен кўп марта минтақа мамлакатлари билан келишувга эришиш учун бу ерга ташриф буюрди. Масала шундаки, араб давлатлари агар Фаластин давлати ташкил этилмаса, ҲАМАСни уруш охиригача қўллаб-қувватлашни таъкидлашди. Исроил бўлса, ҲАМАС ва Фатҳ билан келиша олмаслигини, агар Фаластин давлати шакллантирилса, у давлатда Исроилни душман сифатида кўрмайдиган ҳукумат бошқарувда бўлишини истамоқда. Икки ўртада шу масала бўйича турли музокаралар бўлди”, — деди Фарҳод Каримов.
Сиёсатшуноснинг фикр билдиришича, янги Фаластин давлатининг ҳукумати янгича қарашдаги дунёвий ҳукумат бўлади.
“Куни кеча Қатарда келишув бўлди. Унга кўра, араб давлатлари Фаластинда мўтадил ҳукумат шакллантиришга қарор қилди. Шунинг учун Маҳмуд Аббос бошчилигидаги ҳукумат ҳокимиятдан кетди. Минтақа мамлакатлари АҚШ ва Исроил билан келишувга эришгани боис Исроилнинг Рафаҳга киришига тўсқинлик қилмаяпти. Исроил бу ҳудудларни ҲАМАСдан “тозалаб” бўлгач, фаластинликлар учун Фаластин давлати барпо этилади. Бу давлатни ташкил қилиш учун асосий молиявий инвестор Қатар бўлмоқда. Яъни ҳозир янги Фаластинда Исроил ва АҚШга душман бўлмаган янгича қарашдаги дунёвий ҳукумат шакллантириш режа қилинган. Минтақа давлатлари бу борада Исроил ва АҚШ билан келишиб бўлган”, — дейди сиёсатшунос.
Маълумот ўрнида, олдинроқ Исроил бош вазири Биньямин Нетаньяху урушдан кейин Ғазо секторини бошқариш бўйича ўз режасини биринчи марта Вазирлар Маҳкамасига тақдим этган эди.
Изоҳ (0)