Украинанинг Россия томонидан босиб олинган жанубий ҳудудларида Россия президенти сайлови учун муддатидан олдин овоз бериш жараёнлари бошланди. Бу ҳақда маҳаллий рус нашрларига асосланиб, CNN хабар берди.
Хабарда айтилишича, сайловларда биринчи бўлиб фронт чизиғига яқин аҳоли пунктлари аҳолиси, жумладан, ҳарбийлар ҳам овоз беришади. Рус ҳукумати сайловлар қизғин ва Москвага хайрихоҳ руҳда ўтишига умид билдирмоқда.
Келгуси ой бўлиб ўтиши режалаштирилган сайловда Россия раҳбари Владимир Путин бешинчи муддатга сайланиши кутилмоқда. Агар у яна президентликка сайланса, 2030 йилгача ҳокимиятни сақлаб қола олади.
Россия аввалроқ ўзи босиб олган ҳудудларда сайловлар ўтказган. Бу сайловлар Украинанинг эгалланган ҳудудларида Россия қонунийлигини таъминлашга қаратилган саъй-ҳаракатларнинг бир қисми сифатида кўрилган эди. “ТАСС” нашрининг хабар беришича, жанубий оккупацион зонадаги аҳоли Россия ёки Украина паспортини кўрсатиш орқали сайловларда овоз беришлари мумкин бўлади.
Изоҳ (0)